ASTANA. 24 aqpan. Astana qalasynda 25 aqpannan bastap «Vokord-Sıklop» apparattyq-baǵdarlamalyq keshenderi ónerkásiptik paıdalanýǵa engiziledi. Bul týraly Astana qalasy ákimdiginiń resmı saıty – astana.gov.kz-ke silteme jasaǵan egemen.kz tilshisi habarlady.
«Qaýipsiz qala» jobasy aıasynda 21 apparattyq keshen iske qosylady. Mundaı jyldamdyq ólsheýishter kólik quraldarynyń jyldamdyq rejimin buzý boıynsha jol qozǵalysy erejelerin buzýdy avtomatty túrde tirkeýge múmkindik beredi. «Vokord» keshenderi qalanyń apatty-qaýipti ýchaskelerin taldaý nátıjelerin eskere otyryp, ornatylady.
Jańa qondyrǵylardyń ereksheligi nysannyń jyldamdyǵyn radarlyq jáne optıkalyq ádispen anyqtaý qabilettiligi bolyp tabylady. Bul rette onyń jumys istep turǵany syrttan kórinbeıdi. Júrgizýshilerdi eskertý maqsatynda aqparattandyrý belgileri qoıyldy. «Vokkord» kesheni túnde memlekettik nomerlerdi tanýǵa múmkindik beretin IQ-projektorlarmen jabdyqtalǵan, anyqtaý naqtylyǵy 98 paıyzdy quraıdy.
Kólik quralyn tirkeý týraly málimetter biryńǵaı elektrondy faılmen usynylady, oǵan kólik qozǵalysynyń ólshengen jyldamdyǵy, kóliktiń memlekettik tirkeý nomeri kórsetilgen fotosýret, ólsheý qondyrǵysynyń ornalasqan orny týraly málimet, kólik quraly qozǵalysynyń baǵyty, kóliktiń naqty jyldamdyǵyn tirkeý ýaqyty men kúni, avtojoldyń osy bóliginde ruqsat etilgen jyldamdyq, tirkelgen jol qozǵalysy erejesin buzý týraly aqparat kiredi. Buzýshylyqtar týraly málimetter uıǵarym túrinde kólik ıesiniń mekenjaıyna jiberiledi.
Aıta keteıik, jyl basynan beri Astana qalasynda beınebaqylaý júıeleriniń kómegimen jyldamdyq rejimin buzý boıynsha 3 myńǵa jýyq ákimshilik quqyq buzýshylyq anyqtaldy.
Elaman Qońyr.
Derek, sýret: astana.gov.kz.