О́z ónimińdi shyǵar, óz ónimińdi tutyn. Sonda jatqa qarap jaltańdamaısyń, ózgeden kútip eleńdemeısiń. Búgingi naryqtyq kezeńniń talaby osy, daǵdarysqa qarsy turýdyń qalqany da osy. Sondyqtan, Memleket basshysy otandyq ónim máselesine aıryqsha nazar aýdaryp, qoldaý kórsetip keledi. Osy turǵyda aýyz sý tapshylyǵy bar Mańǵystaý óńirinde jańalyqty jaıttyń habary bar, ol – Mańǵystaý oblysynyń Mańǵystaý aýdanynda mıneraldy sý shyǵaratyn jańa nysan ashylýǵa jaqyn.
Indýstrııalyq-ınnovasııalyq damý memlekettik baǵdarlamasy sheńberinde Mańǵystaý oblysynyń ekinshi besjyldyǵyna arnalǵan ındýstrııalandyrý kartasyn jasaqtaý jáne jańa jobalardy engizý jumystaryna sáıkes, «Shetpe Sýlary LTD» jaýapkershiligi shekteýli seriktestiginiń jalpy quny 225 mln. teńgeni quraıtyn mıneraldy sý shyǵaratyn zaýyty ınvestısııalyq jobasy taıaý kúnderi iske qosylmaq. Bul joba Mańǵystaý oblysynyń aımaqtyq úılestirý keńesiniń 2015 jyldyń maýsymynda qaralyp, aımaqtyq ındýstrııalandyrý kartasyna engen bolatyn.
Zaýytta mıneraldy sý shyǵarý tehnologııasynyń jáne sýdy quıatyn plastık shólmekterdi daıyndaý qurylǵylaryn retteý jumystary qarqyndy júrgizilýde.
Qurylys jumystary 2014 jyly bastaý alǵan zaýyttyń jer kólemi 0,7 ga quraıdy. Qazirgi tańda óndiristi iske qosý maqsatynda tolyqqandy jumystar júrgizilýde. Zaýytta mıneraldy sýdyń gazdalǵan jáne gazdalmaǵan túrde shyǵarylýy qarastyrylǵan. О́nim ártúrli syıymdylyqtaǵy 0,5 lıtr, 1 lıtr, 1,5 lıtr, 5 lıtr, 6 lıtr jáne 19 lıtr ydystarda shyǵarylady. Barlyq plastık ydystar da osy zaýytta daıyndalady. Daıyn ónim «Shaıyr sýy» jáne «Móldir sý Shaıyrdan» atty eki markada shyǵatyn bolady. Konveıer saǵatyna 0,5 lıtr – 2200 dana, 1 lıtr – 2000 dana, 1,5 lıtr – 1800 dana, 5 lıtr – 120 dana, 6 lıtr – 110 dana jáne 19 lıtr 100 dana ónim shyǵarýǵa qaýqarly. Búgingi tańda zaýytqa aýdandaǵy áleýmettik jaǵdaıy tómen otbasylardan 14 adam jumysqa tartylǵan. Aldaǵy ýaqytta zaýyt iske qosylǵan soń, aýdannan qosymsha 15 adam jumysqa qabyldanbaq, deıdi zaýytta atqarylyp jatqan jumystarmen tanystyrǵan óndiris basshysynyń orynbasary Rafhat Qorabaev.
Zaýyt jumysyna kásipkerler palatasy tarapynan, zaýyt basshysyna sý ónimine Qazaqstan Respýblıkasynyń memlekettik standart sertıfıkatyn alý jóninde, jumysqa aýdan turǵyndaryn «Jumyspen qamtýdyń jol kartasy-2020» baǵdarlamasy boıynsha qabyldaý týraly jáne taǵy sondaı basqa da máselelerdi sheshý jóninde keńester berildi.
Shaıyr aýylyna baryp, zaýyttyń qurylys-jabdyqtaý jumystarymen tanysyp shyqqan óńirlik kásipkerler palatasynyń dırektory Jańbyrbaı Dospaev, shalǵaı aýyldardaǵy kásipkerlerdiń basqa oblystarǵa, alys-jaqyn shetelderge tanylýyna kúsh salýǵa daıyn ekendigin jetkizdi.
– Eń bastysy, osyndaı qolynan is keletin azamattarǵa ST-KZ sertıfıkatyn alý máselesin tez arada sheship berýge daıynbyz. Atalmysh sertıfıkat arqyly olar arnaıy ekonomıkalyq aımaqtarda áreket etýine bolady, sondaı-aq, óz taýarlaryn ózge elderde taratyp, memlekettik satyp alý kezinde artyqshylyqqa ıe bolý múmkindikterine qol jetkizedi. Eksportqa jóneltiletin taýardyń shyǵý tegin anyqtap, halyqaralyq naryq jaǵdaıyna beıimdelýge bet burýyna yqpal etýge daıynbyz, – dedi J.Dospaev.
Mańǵystaýdyń shalǵaı aýylynda sharýasyn bastaǵan jigitter óz kásipteri eldiń násibine aınalady dep kútýde.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.