ORAL. 23 aqpan. Batys Qazaqstan oblysynyń tótenshe jaǵdaılar departamenti jedel-qutqarý jasaǵynyń qutqarýshylary Oral qalasynyń mańyndaǵy Zashaǵan aýylynda elikke kómek kórsetti. Mundaı operasııa qutqarýshylardyń tájirıbesinde alǵash ret bolǵanyn atap ótken jón. Bul týraly oblystyq tótenshe jaǵdaılar departamenti memlekettik til jáne aqparat tobynyń baspasóz qyzmetine silteme jasaǵan egemen.kz tilshisi habarlady.
Shaqyrtý Chagano-Naberejnaıa kóshesimen jol júrip bara jatyp, ıtter úıiri shabýyl jasaǵan elikti tapqan qala turǵynynan kelip tústi. Qutqarýshylar jaraqattanǵan elikti jas tabıǵat zertteýshileri stansasyna jetkizý týraly sheshim qabyldaıdy. Ortalyqtyń qyzmetkeri elikti qarap, artqy tuıaqtarynyń qozǵalmaıtyndyǵyn, moınynyń shyǵyp ketkenin anyqtady.
Jaraqattanǵan janýardy jabaıy tabıǵatqa jiberýge bolmaıdy, óıtkeni ol bilikti mal dárigerlik jedel járdeminsiz ólip qalýy múmkin. Elik qazirgi tańda stansa qyzmetkerleriniń qamqorlyǵynda. Oǵan jeke torly oryn ázirlengen.
Temir Qusaıyn.
Derek, sýret: Batys Qazaqstan oblystyq tótenshe jaǵdaılar departamenti memlekettik til jáne aqparat tobynyń baspasóz qyzmeti.