Qytaıda ınternet arqyly satylmaq
Aldaǵy ýaqytta Qytaıdyń Tmall ınternet-dúkeninde qazaqstandyq brendter satylymǵa shyǵarylýy múmkin. Olardyń arasynda ulttyq sýsynymyz – qymyz da bar. Mundaı jaǵymdy jańalyq «Samuryq-Qazyna» AQ basshysy О́mirzaq Shókeevtiń Qytaıdyń eń baı adamy, Alibaba Group kompanııasynyń basqarma tóraǵasy Djek Mamen kezdesýinen keıin belgili boldy.
«Qazposhta» AQ basshysy Baǵdat Mýsınniń Facebook áleýmettik jelisindegi jeke paraqshasyna jazǵan jazbasyna qaraǵanda, kezdesý barysynda taraptar ınternet-saýda, tólem júıesin damytý, tasymal áleýetin paıdalaný syndy birqatar máselege toqtalyp, osy salalardaǵy yntymaqtastyqty arttyrý jóninde sóz qozǵaǵan.
«Eń bastysy, biz Tmall ınternet-dúkenine qazaqstandyq 150 brendtiń tizimin usyndyq. Tmall – Qytaıdyń ishki naryǵynda elektrondy kommersııamen aınalysyp, taýar satatyn platforma. Ol jerde mıllıondaǵan tranzaksııalar jasalady», – dep jazady «Qazposhta» basshysy.
«Bul – qazaqstandyq kásipkerlerge berilip otyrǵan mol múmkindik», – degen «Qazposhta» AQ marketıngtik kommýnıkasııalar departamentiniń dırektory Baıram Ázızov usynylǵan taýarlardyń ishinde qymyz, qurǵaq qymyz, shokolad, bal syndy ónim túrleri bar ekenin aıtty.
Ernar MUHAMBET.