Eskirmeıtin estelik

«Uly Jambyl – qazaqtyń dás­túrli ádebıetiniń asa daryndy as­qaq ja­ratylǵan alyp ókili». Bul – el Prezıdenti N.Á.Nazarbaevtyń Jambyl Jabaev jaıly paıymdy pikiri. Shynymen, aıtys óneriniń aqtańgeri asa daryndy bolmasa, el esinde qalýy ekitalaı edi. Onyń jalyndy jyrlary ult jadynda jattalyp, sana­synda saqtalyp turǵaly qashan. Aıshyqty aıtystarynyń da alar orny aıryqsha. Jambyl týraly kitaptar da az emes, maqalalar da barshylyq, oı-tolǵamdar da jeterlik. Al Qazaqstan Respýblıkasynyń mádenıet qaıratkeri, Jýrnalıster odaǵynyń múshesi, foto­tilshi Jaqsylyq Turlybekovtiń uly aqynnyń 170 jyldyǵyna ar­naǵan fo­toalbomynyń ózine tán ereksheligi bar desek, artyq aıtqandyq bolmas, sirá. Onyń ereksheligi nede dep suraıtyn bolsańyz, onda avtordyń 20 jyl boıy tirnektep jınaqtaǵan eńbekteri engizilgen. «HH ǵasyrdyń Gomeri» atanǵan ǵalamat tulǵanyń 150 jyldyǵy Máskeýde, Fransııa, Túrkııa elderinde toılanǵany belgili. Sol jıyndaǵy sáý­leli sátterden syr shertetin sýretter albomnyń aja­ryn eseleı túsken. Aınalasy on bes betten turatyn foto­albomnyń ishine 200-den astam sýret qam­tylǵan. Jyraýǵa arnalǵan sharapatty sharalar men ıgilikke toly isterdiń izin osy jınaqtan qınalmaı tabasyz. Olardyń qatarynda 1996 jyly Elbasy N.Á.Nazarbaevtyń Jambyl mýzeıin ashý sáti, respýblıkalyq aqyn­dar aıtysy, sahna sańlaqtarynyń qaty­sýymen ótken ártúrli án keshteri bar. Myzǵymas tirshilikte myńdaǵan, mıllıondaǵan jaqsy jandar týraly estelikter estýge bolady. Biraq, olardy kózben kórý kez kelgenniń enshisine buıyra bermeıtin baq. Al osyndaı jaqsy jandardyń beınesin betpe-bet kórip, kelbetin keleshek urpaqqa sý­ret arqyly jetkizý Jaqsylyqtyń taǵ­­­­­­­­dyryna jazylǵan eken. Alashtyń baǵyna bitken asyl azamattardyń oıyp turyp oryn alýy atalmysh albomnyń qadir-qasıetin arttyra túskendeı. Av­tor­dyń budan bólek Abaı Qunanbaev, Dinmuhamed Qonaev týraly jáne Qazaq handyǵynyń 550 jyldyǵyna arnalǵan fotoalbomdary bar ekenin esterińizge salamyz. Babalaryn baǵalaıtyn, ót­kenin saralaıtyn jandar úshin mundaı fotoalbomdar qundy qujat, taptyrmas baılyq, eskirmes estelik bolary daýsyz. Raýan QAIDAR, «Egemen Qazaqstan».