Jaqsy maman qashanda qurmetke ıe

Keshe «Birlik» saıası partııasynyń tóraǵasy Serik Sul­tan­ǵalı, partııa tóraǵasynyń orynbasary Baýyr­jan Bóri­bek jáne «Birlik» partııasy OQO fılıalynyń tóra­ǵasy Samat Qarabaev Ońtústik Qazaqstan polı­teh­nı­kalyq kolledji stýdentterimen kezdesti. – Men ózim 16-17 jasymda aýyldan qalaǵa kelgenmin, – dedi Serik Sul­tanǵalıuly. – Bar armanym Al­maty­ǵa ornyǵyp, úı-jaı alý, ornyqty ju­my­s ornyn tabý edi. Bul maqsatyma jet­tim. Sender ǵajap kezeńde ómir súrip ja­tyrsyńdar. Bodandyq qamytyn kıip, ózgege jaýtańdaǵan elde emes, Táýel­sizdiginiń kúni jarqyraǵan, arman-maqsaty asqaq Qazaqstannyń urpa­ǵy­syńdar. Senderdi úlken múmkindikter kútip tur. Osylaı dep sóz saptaǵan partııa serkesi «Birliktiń» maqsat-muratynan oı­laryn taratty. Onyń aıtýynsha, álemdik daǵdarys basqa da memleket­ter sııaqty Qazaqstanǵa da áserin tıgizip jatyr. Osyndaı jaǵdaıda kúızelýdiń, ýaıymǵa berilýdiń jóni joq. Árbir otbasynyń Alla taǵala bergen óz nesibesi bar. Osyǵan deıin qazaq otbasylary bala-shaǵasyn joǵary oqý oryndarynda oqytýǵa mán berip keldi. О́ziniń jany qalamaǵan, ata-anasynyń qalaýymen mamandyq alǵan jastar qolynda dıplomy bolsa da jumys taba almaı, ilikken jumysty istep júr. Kelesi kezekte ol qazaq jastarynyń jalǵan namysty qoıyp, kásiptik-teh­nıkalyq mamandyqtardy meńgerýi kerek ekenin atap kórsetti. «Men uzaq jyl gaz salasynda basshylyq qyzmette boldym. Sonda baıqaǵanym, joǵary dárejeli eń jas tokardyń jasy alpys­ta edi. Iаǵnı, talapty jasqa jumys kóp. Elbasymyz 2017 jyldan bastap kásiptik-tehnıkalyq mamandyqtarǵa tegin oqytý máselesin Úkimetke tapsyrdy. Osy múmkindikti qur jiberip almańyzdar», – dedi «Birlik» partııasynyń kóshbasshysy Serik Sultanǵalıuly. «Birlik» saıası partııasynyń bir ustanymy – jastarǵa búgingi ómirge qat mamandyqtardy meńgertýge kómektesý bolyp tabylady eken. Mamandyq alý – jan baǵý ǵana emes, ózińniń ornyńdy adaspaı tabýdyń birinshi qadamy. Jaqsy maman qashanda qurmetke ıe. Keń baıtaq Qazaqstanda tabıǵı qazba baılyqtary kóp. Biraq munaıdan túsetin tabystarǵa toqmeıilsimeı, joǵary tehnologııa jetistikterimen jumys jasaýǵa bet alý kerek. «Birlik» partııasynyń tóraǵasy jas­tarǵa «keıde mıllıardtaǵan qarjysy bar adamǵa aqshasy baqyt ákele almaıtynyn atap kórsetti. «Eń úlken baqyt – otbasyń – altyn besigiń, ómirden óz ornyńdy adaspaı tabý. Jasampaz Qa­zaq­stannyń jalyndy urpaǵy – sizderge tilerimiz sol», – dep oıyn túıindedi Serik Sultanǵalıuly. Baqtııar TAIJAN, «Egemen Qazaqstan». Ońtústik Qazaqstan oblysy.