Keshe Qazaqstan Kommýnıstik halyq partııasynyń (QKHP) ókilderi respýblıkalyq saılaýaldy shtaby úgit-nasıhat naýqany aıasynda Tarazdaǵy «Ta-Mak» JShS jumyskerlerimen kezdesý uıymdastyrdy. Jumysshy taby ókilderi kommýnıstik ıdeıany jaqtaıtyndyǵyn aldymen aýyzǵa alǵan QKHP atynan úmitkerler tizimine engen, V shaqyrylymnyń depýtaty Jambyl Ahmetbekov jınalǵandar aldynda sóılep, qazaqstandyq tól ónimniń mańyzdylyǵyn, onyń sapasy jaqsarǵan saıyn suranysqa ıe bolyp kele jatqanyn atap ótti.
Sonymen qatar, sheshen kommýnıstik ıdeıanyń halyqtyń ál-qýatyn arttyrýdy kózdeıtinin, qoǵamda ádilettilik pen kelisimniń bolýyn jaqtaıtynyn aıtty. Ulttyq ekonomıkanyń údemeli ósimi eldegi turaqtylyqtyń negizi bolady, dedi sheshen. V saılanymda kommýnıstik partııa atynan depýtattyqqa ótkender ulttyq ekonomıkanyń ósimimen qatar, halyqtyń muń-muqtajyn qorǵaýda belsendilik kórsetkeninen naqty mysaldar keltirdi. Sonyń ishinde depýtattar Qońyrov, О́mirzaqov jáne t.b. keıbir bankterdiń halyqty aldaý baǵytynda júrgizgen saıasatyn áshkerelep, Úkimet basshysyna saýaldar joldaǵanyn, olardy fraksııadaǵy barlyq depýtattar qoldaǵanyn jetkizdi.
J.Ahmetbekovtiń pikirinshe, otandyq ónimder shyǵaryp júrgen kásiporyndar ókimet tarapynan úlken qoldaýǵa ıe bolýy kerek. «Sonyń ishinde sizderdiń kásiporyndaryńyz da bar. Eger QKHP ókilderi 7 paıyzdyq tabaldyryqty eńserip, taǵy da depýtattar qataryna ótetin bolsa, biz qoldan kelgen kómegimizdi jasap, Úkimet nazaryn osyndaı máselege únemi aýdaryp otyratyn bolamyz», – dedi ol.
Sóziniń sońynda Jambyl Ahmetbekov otandyq óndiristi damytý men qoldaý jańa jumys oryndarynyń ashylýyna da túrtki bolatynyn aıtty. Sondyqtan osy sala únemi aldyńǵy kezektegi nazarda bolýy kerek. Osylaı deı kele, ol kásiporyn qyzmetkerlerin QKHP-ǵa daýys berýge shaqyrdy.
QKHP Jambyl oblystyq komıtetiniń jetekshisi Jarylqasyn Nurálıev durys tamaqtanýǵa negiz bolatyn ónim óndirip otyrǵan kásiporyn salamatty urpaq qalyptastyrýǵa qomaqty úles qosatynyn jetkizdi. «Bizdi elimizde osyndaı kásiporyndardyń kóbeıip kele jatqandyǵy qýantady», – dedi J.Nurálıev.
Jıyn sońynda QKHP-nyń belsendileri «Ta-Mak» JShS jumyskerlerin ózderiniń jıynyna kelip, baǵdarlamalary men pikirlerin tyńdaǵandary úshin alǵystaryn aıtty jáne Parlament Májilisiniń saılaýynda ózderine daýys berýge shaqyrdy.
Jaqsybaı SAMRAT,
«Egemen Qazaqstan».
Jambyl oblysy.