Elimizde «Men elimdi súıemin» aksııasy ótýde. Osyǵan oraı keshe Prezıdent janyndaǵy Ortalyq kommýnıkasııalar qyzmetinde tikeleı efırde telekópir bolyp ótti. Týǵan elge, Otanǵa degen turǵyndardyń súıispenshilik sebepteri men mahabbat lebizin kórsetýge baǵyttalǵan jobanyń maqsaty aıqyn. Bul rette eki juma ishinde 200-den astam jarııalanymdar men beınematerıaldar tarap úlgergen áleýmettik jelide bul jobany qoldaýshylar kún sanap arta túsýde.
Birinshi kezekte arnaıy túsirilgen beınerolıkterge kezek berilip, onda elimizdiń bedeldi tulǵalary óz Otanyn nelikten jaqsy kóretindigi jaıynda sóz qozǵaıdy. Telekópir aıasynda elimizdiń ózge óńirlerimen baılanys ornatylyp, Mańǵystaý oblysynan baılanysqa shyqqan qart Kaspııdiń turǵyndary osynaý patrıottyq bastamaǵa qoldaý kórsetýge qashanda ázirmiz degen izgi nıetterin jetkizdi. Sondaı-aq, búgin bizdiń belsendi jastarymyz teńiz jaǵalaýynda eldigimizdi aıqyndaıtyn sharaǵa óz úlesterin qosý úshin jınalyp tur. Osy rette sóz kezegin Olımpıada oıyndarynyń kúmis júldegeri Ádilbek Nııazymbetov pen QHA Jastar qanatynyń múshesi Islam Musaevqa beremiz degen jastar olarǵa sóz tizginin ustatty. Ata-babamyzdyń azattyq jolyndaǵy armany júzege asqan búgingi elimizdi maqtan tutamyn. Sharshy alańǵa shyqqanda meni qoldap otyrǵan Otanymnyń bar ekendigin sezinemin. Sol qoldaý meni jeńiske jeteleıdi. Týymyz bıikke kóterilgende boıymdy asqaq rýh bıleıdi, men Otanymdy súıemin, dedi Á.Nııazymbetov óz sózinde.
Sondaı-aq, elimizdiń shyraıly shyǵysynan baılanysqa shyqqan óskemendikter de bul sharany qoldaýda belsendilik tanytty. О́z óńiriniń maqtanyshy, elimizdiń eńbek sińirgen sport sheberi, Azııa oıyndarynyń úsh dúrkin chempıony Olga Rypakovaǵa sóz berildi. Ol Qazaqstandy sheksiz súıetinin, sebebi munda sátti ómirge baǵyttalǵan kerekti jaǵdaılardyń barlyǵy jasalǵanyn jáne Otannyń qushaǵy qashanda ystyq ekenin erekshe atap ótken sportshy jas urpaqty eldiń dańqyn kóterýde aıanbaı eńbek etýge shaqyrdy.
Telekópir qonaqtaryna arnaıy sóz berilip, olar da óz kezegimen jyly lebizderin jetkizdi. Bul rette elimizdiń tanymal tulǵalary, sportshylar men ustazdar, ánshiler jáne óner maıtalmandary jıylǵan stýdııada sóz alǵandar qatarynda memleketimizdiń belgili akteri Qýandyq Qystyqbaev boldy. Meniń baǵym bolar, teatrda da, kınoda da men somdaıtyn rólderdiń barlyǵy erlikke, otanshyldyqqa arnalady. Sonyń ishinde elge degen mahabbatymdy dańqty partızan, Halyq Qaharmany Qasym atamyzdyń rólin somdaǵan kezde erekshe sezindim. Bul fılmdi álemniń basqa da elderinde kórsetýde, men ony elimizdiń Táýelsizdigine jasalǵan syı dep bilemin, dedi ol.
Jas búldirshinderdiń júregine patrıottyq sezim nárin egip júrgen ustaz Gúlden Ertaýbaeva da bala tárbıesinde, urpaq táliminde basty oryn alatyn ustanymnyń otansúıgishtikke baýlý ekendigin atap aıtty. Keleshegimizge dańǵyl jol salyp, bolashaqtyń berik irgesin qalaıtyn jastardyń sanasyna elge degen súıispenshilikti sińirýdiń mańyzdylyǵyna aıryqsha toqtalǵan muǵalim, birligi jarasqan el jastarynyń júregi Otan dep soǵýy qajettigin jetkizdi.
Almaty qalasyndaǵy Medeý muz aıdynyna jıylǵan jurt elordamen baılanysqa shyqty. Olardyń qatarynda elimizdiń bedeldi azamattary – Olımpıada chempıony Ermahan Ibragımov, ánshi Mádına Sádýaqasova, Týral Everest, Turar Rahymberlın, Murat Mutyrǵanov ta bar. Otanǵa degen sezimin toptyq bımen jetkizgen turǵyndar flesh-mob uıymdastyrdy. Almatynyń ystyq sáleminen soń telemost ánshi Búrkittiń patrıottyq ánimen aıaqtaldy.
Elmıra MÁTIBAEVA,
«Egemen Qazaqstan».