ASTANA. 29 aqpan. 1 naýryz – Alǵys aıtý kúnine oraı Qorqyt Ata atyndaǵy Qyzylorda memlekettik ýnıversıtetiniń stýdentter saraıynda «Adal sezim, shyn nıetpen alǵys aıtam elime!» atty saltanatty jıyn ótti. Bul týraly egemen.kz tilshisi habarlady.
Sharaǵa oblysymyzdaǵy etno-mádenı birlestik ókilderi, ýnıversıtettiń oqytýshy-professorlary men stýdent-jastary qatysty. Jıyn elimizde ómir súrip jatqan túrli etnostardyń qazaq jerine kelý tarıhy jaıly derekti fılmmen bastaldy.
Saltanatty keshtiń ashylýynda ýnıversıtet rektory, tehnıka ǵylymdarynyń doktory, professor Qylyshbaı Bısenov qazaqtyń keń baıtaq dalasyn meken etken 130-dan asa ult pen ulystyń yntymaǵyn odan ári nyǵaıtyp, arman-tilegin bir arnaǵa toǵystyratyn bul merekeniń mańyzdylyǵyna toqtaldy.
«Tarıhı derekterge súıener bolsaq, 1946 jyly KSRO-da jalpy jer aýdarylǵandar sany 2 mln. 463 940 adam bolsa, olardyń qazaq jerin panalaǵandary 1 mln. 200 myń boldy. Orta Azııaǵa qonys aýdarǵandardyń 36%-y qazaq jerin panalaǵan. Bizdiń ata-babalarymyz qıyn-qystaý kezeńde óziniń meıirimi men parasatyn osylaı tanytty. Uly Dala Elinen pana tapqan ózge ult ókilderiniń búginge deıin bizdi asa qurmet tutyp, qadirleıtini de osydan», – dedi ýnıversıtet rektory Qylyshbaı Bısenov.
Kesh aıasynda oblystyq koreı etnomádenı birlestigi tóraǵasynyń orynbasary Vılorıı Shın, «Qazaqstan orystary qaýymdastyǵy» qoǵamdyq birlestigi oblystyq fılıalynyń jetekshisi Vladımır Tolokonnıkov, oblys ákimi apparaty janyndaǵy «Qoǵamdyq kelisim» ortalyǵynyń dırektory Ýalıhan Ibraevtar sóz sóılep, qazaq halqy qaı kezde de qysylǵanǵa dem berip, qınalǵandy qoltyǵynan demegen uly dala urpaqtary ekendigin erekshe sezimmen jetkizdi.
Merekelik keshte orys, ýkraın, koreı, polıak, mońǵol, ıtalıan halyqtarynyń ulttyq ánderi oryndalyp, «Dıdar» halyqtyq bı ansambliniń qoıylymdary sahnalandy.
Sonymen qatar, ýnıversıtette bilim alyp jatqan ózge ult stýdentteri ózderiniń alǵystaryn jetkizdi.
Aıan Ábdýálı.
Derek, sýret: egemen.kz.