TARAZ. 29 aqpan. Bolashaqta jambyldyq sharýalar bir jylda eki ret ónim jınaýdy josparlap otyr. Tyń tásildi oblysqa arnaıy kelgen Qazaq ulttyq ýnıversıtetiniń ǵalymdary usynyp otyr. Bul týraly Jambyl oblysy ákiminiń baspasóz qyzmetine silteme jasaǵan egemen.kz tilshisi habarlady.
Argarlyq ólke men oqý ornynyń arasyndaǵy baılanys birneshe jyldan beri jalǵasyp keledi. Jyl basynda Jambyl oblysynyń ákimi Kárim Kókirekbaev Qazaq ulttyq ýnıversıtetine arnaıy baryp, óńirdegi aýyl sharýashylyǵyn damytýǵa qatysty ǵalymdarmen keńesken bolatyn. Araǵa ýaqyt salyp ǵalymdar Áýlıeata jerinde qaıta bas qosty. Bul joly salaǵa tyń jańalyqtar engizýmen qatar, ónimdilikti arttyrýǵa qatysty da jańa tehnologııalardy tanystyrdy. Sonyń biri – bir jylda eki ret ónim jınaý. Ǵalymdar tájirıbeni Merki aýdanyndaǵy «Nurjan» sharýa qojalyǵynyń egis alqaptarynda júrgizgen. Masaqty-maıly daqyldardyń 10 túrin egip, onyń ónimin alýdy kózdegen tájirıbe sátti júzege asty. Aımaqtaǵy 6 aýdandy pılottyq dep tanyǵan olar bıyldan bastap sharýa qojalyqtarynyń beıinine qaraı birlese jumys atqarmaq.
Oblys ákimi Kárim Kókirekbaev arnaıy jıynda aýyl sharýashylyǵynda atqarylǵan jumystarǵa toqtaldy. Bolashaqta iske asyrylatyn jobalarmen bólisti.
Sondaı-aq, oblys kóleminde et baǵytyndaǵy iri jobalar iske asyrylýda.
«Merki aýdanyndaǵy «Agrostan» jaýapkershiligi shekteýli seriktestiginiń malaızııalyq kásipkerlermen birge Jańa Zelandııanyń jobasy negizinde salynǵan 5000 usaq malǵa arnalǵan bordaqylaý kesheni paıdalanýǵa berildi. Moıynqum aýdanyndaǵy «Agro fırma Túrikpen» jaýapkershiligi shekteýli seriktestigi 3 myń bas múıizdi iri-qara malǵa arnalǵan bordaqylaý keshenin jáne 5 myń bas múıizdi iri-qara mal sharýashylyq reprodýktor jobasynyń qurylysyn júzege asyrýda. Osy jobany iske asyrý maqsatynda Reseı Federasııasynan 900 bas qalmyq tuqymynyń iri qara malyn jáne 1200 bastan jylqy satyp alyndy. Jalpy osy salada ónimdilikti arttyrýymyz kerek», – dedi aımaq basshysy.
Eki kúnge sozylatyn semınar keńes barysynda ǵalymdar aýdandardy aralap, sharýashylyq basshylarymen praktıkalyq kezdesýler ótkizetin bolady.
Oralhan Dáýit.
Derek, sýret: Jambyl oblysy ákiminiń baspasóz qyzmeti.