TARAZ. 29 aqpan. Jambyl oblysynyń ishki ister departamentiniń jergilikti polısııa qyzmetiniń jol-patrýldik polısııa batalonynyń ınspektorlary jedel-izdestirý is-sharalaryn júrgizý barysynda Jambyl oblysynyń «Býrylbaıtal» beketinde «Shymkent-Qaraǵandy» baǵytyndaǵy jolaýshylar avtobýsyn toqtatty. Bul týraly Jambyl oblysy ishki ister departamentiniń baspasóz qyzmetine silteme jasaǵan egemen.kz tilshisi habarlady.
Ishki ister organdarynyń krımınaldyq polısııa bólimi jáne «Delta-Dolına» aımaqaralyq esirtki bıznesine qarsy kúres bóliminiń qyzmetkerleri, sondaı-aq ishki ister departamentiniń kóshi-qon polısııasynyń ınspektorlar toby birlesip, avtobýs ishine jáne onyń tehnıkalyq jaǵdaıyna tekserý júrgizdi.
Tergeý barysynda jolaýshylardyń biri – Astana qalasynyń turǵyny, 35 jastaǵy er adamnyń jol sómkesinen qoıý jasyl tústi, erekshe ıisti ósimdik tektes qarasora zaty bar qara polıetılen paket tabylyp, tárkilendi.
Sot-hımııalyq saraptamasyna sáıkes, tárkilengen zat salmaǵy 19 kg 220 gramm gashısh esirtki zaty bolyp shyqty. Kúdikti kinásin moıyndap, ýaqytsha ustaý oqshaýlaǵyshyna qamaýǵa alyndy.
Osy derek boıynsha qylmystyq is qozǵaldy. Osyǵan sáıkes qylmysker úsh jyldan jeti jylǵa deıingi merzimge bas bostandyǵynan aıyrýǵa jazalanady.
Qazirgi kezde sotqa deıingi tergeý amaldary júrgizilýde.
Oralhan Dáýit.
Derek, sýret: Jambyl oblysy ishki ister departamentiniń baspasóz qyzmeti.