TARAZ. 29 aqpan. Jambyl oblysyndaǵy makaron sehynda táýligine 15 tonna ónim shyǵarylady. Sapaly taýar Almaty, Astana qalalaryna tasymaldanýda. Bul týraly egemen.kz tilshisi habarlady.
Baızaq aýdany Qyzyl juldyz aýylyndaǵy Rola-7 jaýapkershiligi shekteýli seriktestiginiń qurylǵanyna 8 jylǵa jýyq ýaqyt boldy. Alǵashynda bul mańaıda bir ǵana «Chabres» jaıma sehy jumys istegen. Arada eki jyl ótkende ekinshi jaıma sehy ashyldy. 2011 jyly qurǵaq kespe jasaıtyn úshinshi seh óz jumysyn bastady. Bul kezde munda jumysshylar sany da arta tústi. 2012 jyly kásiporynǵa ónimderi halyqaralyq «Halal» standart talabyna saı ekendigin aıǵaqtaıtyn arnaıy kýálik berildi. Jumys durys jolǵa qoıyldy. Kásiporynnyń sapaly ónimderine suranys ulǵaıdy.
Munda búginde joǵary, birinshi jáne ekinshi surypty un shyǵarylady. Joǵary jáne birinshi suryptar makaron men kespe ázirleýge jumsalady. Al ekinshi surypty un Tájikstanǵa eksporttalady.
Qazir úsh aýysymda 155 adam jumys istep, táýligine 15 tonna makaron jáne kespe shyǵarady. Búginde Rola-7 ónimderi Astana, Almaty qalalaryna jáne birneshe oblystarǵa jóneltiledi. Munda makaron óniminiń 20 túri shyǵarylady. Kásiporynda 18 avtokólik turaqty jumys istep tur. Jumysshylar men kásiporyn basshylyǵy arasynda jasalǵan kelisimshart bar. Keıingi jyldary jumysshylar sany úsh esege ulǵaıǵan. Byltyr jaımanyń jyldam daıyndalatyn túri boıynsha taǵy bir seh ashyldy.
Aldaǵy ýaqytta ónimderdi syrt elderge de shyǵarýy múmkin. Munda jumysshylarymyzǵa qajetti jaǵdaıdyń barlyǵy jasalǵan. Tártipti qadaǵalaý, jumys belsendiligin nazarda ustaý maqsatymen beınebaqylaý qoıylǵan.
Seriktestik «Bıznestiń jol kartasy – 2020» baǵdarlamasy boıynsha «Halyq Banki» aksıonerlik qoǵamynan 14 paıyzben jalpy somasy 165,5 mln. teńge kóleminde nesıe alýǵa qol jetkizdi. Onyń 35 mln. teńgesi jańa seh qurylysyna, 38,5 mln. teńgesi aınalmaly qordy toltyrýǵa jáne 92 mln. teńgesi qajetti qural-jabdyqtar satyp alýǵa jumsalady. Alynǵan nesıeniń 50 paıyzy atalǵan baǵdarlama aıasynda sýbsıdııalandyryldy.
Oralhan Dáýit.
Derek, sýret: egemen.kz.