Keleli máseleler qozǵalǵan kezdesý

«Birlik» partııasynyń músheleri men partııanyń jastar qanaty Astanadaǵy Respýblıkalyq ǵylymı-tehnıkalyq kitaphanada tehnologııa jáne bıznes kolledjiniń stýdentterimen kezdesti. Kitaphana isiniń búgingi jaǵdaıy men damý perspektıvasy jáne kitap qorynyń únemi jańaryp otyrýy tóńi­regindegi pikir almasýlar «Birlik» partııasy sharasynyń negizgi arqaýy boldy. Bas­pa ónimderine degen oqyrmannyń qyzy­ǵýshylyǵyn oıatýǵa baǵyttalǵan aksııalar men túrli sharalardy uıymdastyra oty­ryp, qoǵam ómirindegi kitaptyń rólin nyǵaıtýdyń mańyzy jónindegi oılar ortaǵa salyndy. Partııa ókilderi kitaptyń tulǵany qalyptastyrýdaǵy orny týraly óz táji­rıbelerimen bólisý maqsatynda búgin­gi aksııaǵa jeke kitaphanalarynan ózderi­niń birneshe súıikti kitaptaryn ala kelipti. Sonymen qatar, kitap oqýdy keń nası­hattaýǵa arnalǵan usynystaryn da jarııa qyldy. «Birlik» partııasy tóraǵasynyń oryn­basary Bolat Baıqadamov pen partııa múshesi Murat Raevtyń pikirinshe, qandaı keremet damyǵan zaman bolsa da adamzat mádenıetinde kitaptyń mańyzy esh kemimeıdi. Kitap oqý rýhanı-mádenı kemeldikke jetkizetindikten, qazirgi jastar ómiriniń ajyramas bóligine aınalýy tıis. Kezdesý sońynda «Birlik» partııasynyń jastar qanaty kitap­hana­nyń aldynda «Kitap – bilim bulaǵy», «Bros myshký – vozmı knıjký» atty flesh-mob ótkizdi. Olar oqyrmandar men qala turǵyndaryn partııanyń osy bastamasyn qoldaýǵa shaqyratyn únparaqtar taratty. «Birlik» partııasynyń atynan Par­lament Májilisine úmitkerlerdiń pikirin­she, azamattardyń kitap oqý máde­nıetin kóterý partııa jumysynyń bir baǵyty bolýy tıis. Sondyqtan, olar bolashaqta osy taqyrypty keńirek qaý­zaý úshin taǵy da birneshe is-shara uıymdastyrýdy kózdep otyr eken. Al jeksenbi kúni «Birlik» par­tııa­sy­nyń ókilderi Astanadaǵy qarttar men múgedekter úıiniń ujymymen kezdes­ti. Atalǵan partııadan Parlament Májili­sine usynylǵan kandıdattar osy kezdesý barysynda ózderiniń saılaýaldy baǵdarlamalarymen tanystyryp, ulttyq dástúrler men adamı qundylyqtarǵa baılanysty aǵa urpaqtyń oıyndaǵy kóptegen túıtkilderdi qozǵady. Qıly taǵdyrdyń tálkegimen qarttar úıine kúni qaraǵan qarııalardyń ómirge degen qulshynysy erekshe. О́kinishtisi, memleket tarapynan olarǵa barlyq jaǵdaı jasalǵanymen, aǵaıyn-týystary men jaqyn-juraǵattarynyń iltıpaty men qurmetine zárý. Sondyqtan, «Birlik» partııasynyń qoǵamdaǵy mádenı-rýhanı qundylyqtardy túletip, ár qoǵam múshesine izgi nıet bildirip, jan jy­lýlyǵyn syılaýdy nasıhattaýy qart­tardyń kóńil-kúıin erekshe kóterdi. Láıla EDILQYZY, «Egemen Qazaqstan». Astana.