Ortalyq saılaý komıssııasynyń hatshysy Baqyt Meldeshov keshe ótkizgen brıfıngte osy jyldyń 28 aqpanynda saılaýshylar tizimderin ákimdikterden saılaý ýchaskelerine berý aıaqtalǵanyn habardar etti.
OSK hatshysynyń atap ótkenindeı, Konstıtýsııaǵa jáne saılaý zańnamasyna sáıkes on segiz jasqa tolǵan árbir azamat saılaýda daýys berý quqyǵyna ıe. Saılaýshy óziniń bul quqyǵyn iske asyra alýy úshin ákimdikter saılaýshylar tizimderin jasaıdy jáne olardaǵy málimetterdiń anyqtyǵy men tolyqtyǵyna jaýap beredi. Naqtyly saılaý ýchaskesinde azamatty saılaýshylar tizimine engizý úshin onyń osy saılaý ýchaskesiniń aýmaǵynda turǵylyqty jeri boıynsha tirkelý faktisi negiz bolady.
«Saılaý týraly» Zańǵa sáıkes ákimdikter 28 aqpannan keshiktirmeı tıisti ýchaskelik saılaý komıssııalaryna saılaýshylardyń jańartylǵan tizimderin akt boıynsha berdi, – dedi B.Meldeshov osy jóninde. – Sol sátten bastap ýchaskelik saılaý komıssııalary tikeleı saılaý ýchaskelerindegi jumysqa kirisedi. Jalpy, respýblıka boıynsha 9840 saılaý ýchaskesi quryldy. Tórtinshi naýryzdan bastap saılaýshylar tizimderi tanysý úshin ýchaskelik saılaý komıssııalarynyń úı-jaılarynda usynylady. Árbir saılaýshy olarda ózi týraly derekterdi daýys berý kúnine deıin jáne saılaý kúni teksere alady».
OSK hatshysy saılaýshynyń ózi týraly derekterdi qalaı bile alatynyna da toqtaldy. B.Meldeshovtyń aıtýynsha, ol úshin ýchaskelik saılaý komıssııasyna jeke basyn kýálandyratyn, sondaı-aq, turǵylyqty jerinde tirkelgenin (mekenjaı anyqtamasy nemese azamattardy tirkeý kitaby) rastaıtyn qujattarmen kelip, saılaýshylar tizimderimen muqııat tanysý qajet. Mekenjaı anyqtamasyn saılaýshy halyqqa qyzmet kórsetý ortalyǵynda (HQKO), «elektrondyq úkimet» portalynda (elektrondyq-sıfrlyq qoltańba - ESQ bolǵanda) nemese JSN boıynsha jáne HQKO-da ornalasqan termınal arqyly ala alady.
«Saılaýshynyń tegi tizimde joq bolǵan nemese ózi týraly derekterde dálsizdikterdi anyqtaǵan jaǵdaıda, saılaýshy joǵaryda atalǵan qujattardyń negizinde ony tizimge engizýdi nemese qajetti túzetýler engizýdi talap ete alady, – dedi OSK hatshysy ári qaraı. – Qazaqstan Respýblıkasynyń aýmaǵyndaǵy óziniń eldi mekeni sheginen tysqary shyqqan jaǵdaıda, saılaýshyǵa daýys berý múmkindigin daýys berý quqyǵyn beretin esepten shyǵarý kýáligin beredi. Ony saılaýshy tirkelgen jeri boıynsha ýchaskelik saılaý komıssııasynda jazbasha ótinishiniń negizinde jáne jeke kýáligin usynǵanda 4 naýryzdan bastap 19 naýryz kúngi saǵat 18.00-ge deıin ala alady».
Budan soń B.Meldeshov daýys berýge kele almaıtyn saılaýshylarǵa esepten shyǵarý kýáligin berý jaıynan habardar etti. «Azamattyń, sondaı-aq, óziniń atyna daýys berý quqyǵyn beretin esepten shyǵarý kýáligin alýǵa ýákiletti adamǵa senimhat berýge quqyǵy bar. Bul basqa mekenjaıda bolyp, óziniń saılaý ýchaskesine daýys berý úshin kele almaıtyn saılaýshylarǵa esepten shyǵarý kýáligin alyp, saılaýǵa qatysýǵa múmkindik beredi. Bul rette esepten shyǵarý kýáligi basqa saılaý okrýginde nemese bir eldi meken sheginde basqa saılaý ýchaskesinde daýys berýge nıet bildirgen saılaýshylarǵa berilmeıtinin este saqtaǵan mańyzdy», – dedi ol.
Sonymen, Parlament Májilisiniń depýtattaryn saılaýda saılaýshy basqa eldi mekendegi kez kelgen saılaý ýchaskesinde daýys bere alady. Sebebi, mundaı jaǵdaıda búkil el saılaý okrýgi bolyp tabylady. Al máslıhattar depýtattaryn saılaýda basqa eldi mekendegi saılaý ýchaskelerinde ǵana, biraq saılaýshy tirkelgen saılaý okrýginiń sheginde ǵana daýys bere alady. Daýys berý kúni ýchaskelik saılaý komıssııasy esepten shyǵarý kýáligin jáne saılaýshynyń jeke basyn kýálandyratyn qujatty usynǵan jaǵdaıda, ony kelgen jeri boıynsha saılaýshylar tizimine engizedi.