Keshe Qazaqstan Respýblıkasy Premer-Mınıstriniń birinshi orynbasary Baqytjan Saǵyntaev Túrkitildes memleketter yntymaqtastyǵy keńesiniń (TMYK) Bas hatshysy Ramıl Gasanovpen kelissózder júrgizdi, dep habarlady Premer-Mınıstrdiń baspasóz qyzmeti.
Kezdesý barysynda mádenıet almasýdy nyǵaıtý, bilim berý, týrızm salalaryndaǵy baılanystardy damytýdy qosa alǵanda, kóp jaqty yntymaqtastyqtyń negizgi baǵyttary talqylandy.
Baqytjan Saǵyntaev pen Ramıl Gasanov TMYK-qa múshe memleketterdiń tranzıttik áleýetin, sonyń ishinde Transkaspıı halyqaralyq kólik baǵyty arqyly da odan ári damytýdyń mańyzdylyǵyn atap kórsetti.
Qazirgi ýaqytta Túrki keńesi qoldaýymen Halyqaralyq qurama júk tasymaldary týraly kelisimniń jobasy talqylanýda, onyń maqsaty júkti quramaly túrde Kaspıı teńizi arqyly tasymaldaý nusqasynyń tıimdiligin arttyrý jáne Qytaı-Eýropa baǵytyndaǵy tranzıtti ulǵaıtý.
TMYK qurý týraly kelisimge 2009 jyldyń 3 qazanynda Nahchyvan qalasynda (Ázerbaıjan Respýblıkasy) ótken 9-shy sammıtte Qazaqstan Respýblıkasynyń Prezıdenti Nursultan Nazarbaevtyń bastamasy boıynsha qol qoıylǵan bolatyn.
Ústimizdegi jyly Qazaqstan Respýblıkasy Túrki keńesine tóraǵalyq etedi. TMYK Hatshylyǵynyń shtab-páteri Ystambul qalasynda ornalasqan.