Jańarýdyń jańa kezeńi

Keshe Qazaqstan Res­pýb­lıkasynyń Tuńǵysh Pre­zıdenti – Elbasy kitapha­na­synda Alǵys aıtý kúnine arnalǵan sharaǵa qatysqan Nursultan Nazarbaev 1 naý­ryz taǵy bir tarıhı sát – «Nur Otan» partııasynyń qu­ryl­ǵan kúni ekenin atap ótti. Bul oraıda, Memleket basshysy: «Men barshańyzdy osy aıshyqty kúnmen quttyq­taımyn. «Nur Otan» 17 jylda úl­ken joldy júrip ótti. Bizdiń partııamyzdyń saıası kósh­basshylyǵy barlyq qazaqstan­dyq maqtan tutatyn naqty je­tistikterge aınaldy. Qazir partııa aldynda aıryqsha mańyzdy mindetter tur. Taıaýda ótken Úkimettiń keńeıtilgen otyrysynda men qoljetimdi baspana, jol, elektr stansalarynyń qurylystaryna, árbir kent­tegi nysandardy jóndeý jumys­taryna eleýli qarajat bólý týraly málimdedim. Osynyń bári adamdar úshin jasalýda, olar jumysqa tartylady. Osy qyzmettiń bárin «Nur Otan» júrgizetin bolady. Ár­bir qazaqstandyqtyń ıgiligine ba­ǵyt­talǵan, júrgizilip jatqan reformalar men baǵdarlamalardyń mánin árbir adamǵa túsindire alamyz dep úmittenemin», – dedi. Qazaqstan Prezıdenti qazir «Nur Otan» partııasy Má­ji­lis saılaýy boıynsha saı­laý naýqanyn júrgizip jatqa­nyna nazar aýdardy. «Bul – memlekettiń barshany uıysty­ryp, Qazaqstanymyzdyń órken­deýine jumyldyryp otyrǵan naǵyz basty saıası kúshi ekenine senimdimin. Saılaý naýqany aıasynda tek úgit-nasıhat qana emes, tuǵyrnamany tanystyrý da júrip jatyr. Partııanyń ózi jańa­ryp, jańa jaqtastarmen toly­ǵýda. Bizdiń qatarymyzǵa Qazaq­stannyń jańa azamattary qosylyp otyrǵanynyń máni zor», – dedi Nursultan Nazarbaev. Qazaqstan Prezıdenti rásim barysynda «Nur Otannyń» jańa múshelerine partııa bıletterin tapsyrdy. Nursultan Nazarbaev olardyń bárin ómir jolyndaǵy jańa kezeńderimen quttyqtap, myqty densaýlyq pen ıgilik tiledi. «Bul – Sizder úshin saıası saladaǵy jańa joldyń basy. Sizder halyqtyń ıgiligine baǵyttalǵan partııanyń ıdeıalary men oı-tujyrymdaryn jetkizýshiler bolasyzdar. Sizder óz entýzıazmdaryńyzben jáne óz halqyńyzǵa paıdasyn tıgizýge degen nıetterińizben adamdardyń júregine jiger berýge tıissizder. Búgin partııaǵa túrli etnostardyń ókilderi kirip otyrǵanynyń da tereń sımvoldyq máni bar», – dedi Nursultan Nazarbaev. Nursultan Nazarbaev «Nur Otannyń» barlyq belsendilerin elimizdiń Táýelsizdiginiń 25 jyldyǵyn tyń tabystarmen jáne jasampaz ózgeristermen qarsy alýǵa shaqyrdy. «Eń aldymen «shaǵyn ister» – árbir qala men aýyldy, joldardy, mádenıet nysandaryn abattandyrý jaıyn este ustaý kerek. Árbir eldi meken jumys pen demalys úshin taza, jaıly bola túsýi tıis. 25 jyldyq mereke degenimiz osy. Barlyq qala men eldi mekenderde aýmaqty tazartý men kógaldandyrý, balalar úılerine, egde adamdarǵa, muqtaj jandarǵa kómektesý jumystary júrgizilýi kerek», – dedi Qazaqstan Prezıdenti. Memleket basshysy budan bes jyl buryn, Táýelsizdiktiń 20 jyldyǵy belesinde «Aýyldy kórkeıtý – Qazaqstandy kórkeıtý» jobasy iske asyrylǵanyn eske saldy jáne bıyl da búkil elde dál sondaı patrıottyq aksııa ótkizýge shaqyrdy. «Elimiz halqynyń jartysyna jýyǵy aýyldyq jerlerde turady. Búginde bizdiń búkil tabysymyzdyń qozǵaýshy kúshine aınalatyn eldiń agrarlyq sektoryn damytýǵa barlyq múmkindik bar. Muny «Nur Otanǵa» jáne partııanyń árbir múshesine meniń tikeleı tapsyrmam dep sanańyzdar», – dedi Nursultan Nazarbaev. Budan keıin Qazaqstan Pre­zıdenti Naýryz meıramy qar­sańynda Májilis pen máslıhattar saılaýlary ótetinine, bıliktiń búkil ókildi tarmaǵy qaıta saılanatynyna nazar aýdardy. «Men barsha qazaqstandyqqa aldaǵy saılaý bizdiń jańarýymyzdyń, alda turǵan barlyq mindetterimizdiń oryndalýynyń jańa kezeńiniń basy bolýyna tilektestigimdi bildirgim keledi», – dedi Memleket basshysy. Láıla EDILQYZY, «Egemen Qazaqstan». «Nur Otan» partııasynyń saılaý qory qarajatynyń esebinen tólendi.Tapsyrys berýshi: F.Sh.Qýanǵanov.