Arqadaǵy abyroıy men bedeli zor alma-materdiń biri – Qaraǵandy memlekettik tehnıkalyq ýnıversıtetinde ǵıbraty mol shara ótti. Atalǵan oqý ornynda byltyrdan beri «Serpin-2050» baǵdarlamasy boıynsha bilim alyp jatqan stýdent jastar Elbasy Nursultan Nazarbaevtyń seriktesteri – elimizdiń tuńǵysh Syrtqy ister mınıstri Tóleýtaı Súleımenov, Memlekettik syılyqtyń laýreaty Qabıdolla Sárekenov, qurmetti metallýrgter Qýanysh Omashev, Ermek Tóleýbaev, Vıktor Nıkonov jáne professor Qaırolla Qyzyrovpen kezdesti.
Shara barysynda Elbasynyń seriktesteri ýnıversıtet qabyrǵasyndaǵy jumysshy mamandyqtary ortalyǵy, qurylys ınjınırıngi zerthanasy, tehnıkalyq jáne óndiristik ortalyq, dánekerleý ınstıtýty, «Shnaıder Elektrık» ınnovasııalyq zerthanasy jáne «Imstalkon» AQ-taǵy «Dánekerleý jáne quıý óndirisi» kafedrasynyń fılıalynda bolyp, jumysshy mamandyǵyn úırenip júrgen jastarmen júzdesti. О́zderine tanys stanoktar janynda temir jonyp, túrli bólshekter jasap jatqan stýdentterdiń qımylyna qyzyǵa qaraǵan Elbasynyń seriktesteri qoldaryna egeý alyp, osydan jarty ǵasyr buryn aınalysqan kásiptiń keıbir qyrlaryn eske túsiristi. Aǵa býyn ókilderiniń bul isine stýdent jastar da qurmetpen qarap, olardyń áreket barysynda árbir aıtqan aqyl-keńesine muqııat qulaq túrdi.
Búgingi kúni memlekettik ındýstrııalyq-ınnovasııalyq damý baǵdarlamasyn júzege asyrý úshin bizge jańa pishimdegi ınjenerler, ıaǵnı tórtinshi ındýstrııalyq revolıýsııa men altynshy tehnologııalyq qurylys talaptaryna jaýap bere alatyn mamandyq ıeleri aýadaı qajet. Mine, osy saıasatqa sáıkes, qazirgi tańda QarMTÝ qabyrǵasynda «Serpin-2050» baǵdarlamasy boıynsha elimizdiń ońtústik óńirlerinen kelgen 316 jas oqyp jatyr. Stýdentter ınjener mamandyǵyna qosa suranysy óte joǵary 18 jumysshy mamandyǵyn ıgerý ústinde.
Jalpy, «Serpin-2050» áleýmettik jobasy Memleket basshysy Nursultan Nazarbaevtyń «Qazaqstan-2050» Strategııasynda aıtylǵan mindetterdi júzege asyrýǵa arnalǵan is-sharalar ishindegi mańyzdylarynyń biri. Bizdiń memleketimiz úshin bul strategııaǵa sáıkes, damyǵan 30 eldiń qataryna qosylý úshin bilikti mamandar daıarlaý máselesi qashanda ómirsheń bolyp turady. Osyndaı múbárak maqsatty kózdegen «Serpin-2050» baǵdarlamasy Qazaqstannyń ońtústiktiń óńirlerindegi jastardy elimizdiń kadr máselesi sheshimin tappaı otyrǵan shyǵys, batys jáne soltústik aımaqtarynda oqytyp, jumysqa ornalastyrý syndy ıgi sharýamen aınalysýda.
Osy jerde mynadaı tarıhı sáıkestikti aıtpaı ketýge taǵy bolmaıdy. Kezinde Tuńǵysh Prezıdentimizdiń ózi bir top joldastarymen týǵan ólkeden alysqa attanyp, tehnıkalyq joǵary bilim alyp, eńbek maıdanynda shyńdaldy emes pe?! Mine, qyzyq, arada jarty ǵasyrǵa jýyq ýaqyt ótkende Elbasynyń júrip ótken ómir jolymen óskeleń urpaq ókilderi de kenshiler astanasyna kelip, tehnıkalyq mamandyqtardyń qyr-syryna qanyǵyp jatyr.
Ýnıversıtettiń májilis zalynda ótken kezdesý barysynda osy jaıynda kóptegen mazmundy sóz aıtyldy. Sóz tizginin aldymen alǵan elimizdiń tuńǵysh Syrtqy ister mınıstri Tóleýtaı Súleımenov jastarǵa búgingi kúnde elimiz aldynda turǵan mańyzdy mindetter men stýdent jastardyń qoǵam aldyndaǵy jaýapkershiligi týraly áserli áńgime aıtyp berdi. «HHI ǵasyr bilimniń, aqparattyń jańa tehnologııanyń óristeý ǵasyry. Bilimniń, ǵylymnyń básekege qabilettiligi bul kúnde kóptegen memleketter úshin kókeıkesti másele bolyp otyr. Ozyq ǵylymı-tehnıkalyq ınfraqurylymsyz jáne kásibı sheberligi joǵary bilimdi kadrlarsyz, jahandaný talaptaryna sáıkes damý múmkin emes. Sondyqtan sizderdiń aldaryńyzda zor jaýapkershilikter men múmkindikter tur» – dedi Tóleýtaı Súleımenov.
Ǵalym, Memlekettik syılyqtyń laýreaty Qabıdolla Sárekenov stýdentterge arnaǵan sózinde bylaı dedi: «Sizderdiń aralaryńyzda elimizdiń bolashaq prezıdentteri otyrýy múmkin. Kezinde biz de sizder sııaqty osy oqý ornynda oqydyq. Sol kezdiń ózinde bizder aldymyzǵa úlken maqsattar qoıa bildik. Sondyqtan sizder de zamannyń aǵymyna saı bilim alyp, alǵa umtylyp, ósip-órkendeýlerińiz kerek».
Elbasynyń seriktesterimen ótken kezdesýde stýdentter ózderiniń kókeılerinde júrgen suraqtaryna tolyqqandy jaýaptar aldy. Ásirese, jastardy Elbasy Nursultan Nazarbaevtyń stýdenttik kezi qatty qyzyqtyrdy. Sondaı-aq, olar qurmetti qonaqtardan jastyq shaqtaryndaǵy este qalǵan qyzyqty oqıǵalardy aıtyp berýin ótindi.
Kezdesý sońynda QarMTÝ-diń stýdentteri Elbasynyń bastamasymen dúnıege kelgen «Serpin-2050» baǵdarlamasyna, ony júzege asyrýshylarǵa shyn júrekten alǵys aıtty. Mysaly, stýdent Erlan Kóbeısinov óz oıyn bylaısha jetkizdi: «Men «Serpin-2050» baǵdarlamasy boıynsha ońtústikten kelip oqyp jatqan stýdenttiń birimin. О́mir jolymnyń osylaısha qalyptasqanyna esh ókinbeımin. Qarap tursam, meniń jáne men sııaqty «Serpin» boıynsha oqyp jatqan jastardyń jaǵdaıy basqa stýdentterden sál de bolsa artyq sııaqty. Birinshiden, biz munda memlekettik grantpen tegin oqyp jatyrmyz. Turatyn jataqhanamyz jaıly, turmysqa qajetti dúnıelerdiń bárimen tolyqtaı qamtamasyz etilgen. Ekinshiden, bizdiń erteńgi kúnge degen senimimiz mol. О́ıtkeni, biz qolymyzǵa dıplom tıgennen soń jumyssyz qalmaıtynymyzdy jaqsy bilemiz. Sol sebepti biz ýaqytymyzdy bosqa óltirmeı, tehnıkalyq mamandyqtardy tereńdeı ıgerýge bar kúsh-jigerimizdi jumsap jatyrmyz. Eń aldymen barsha «serpindikter» atynan bizderge mol múmkindikter bergen Elbasy Nursultan Ábishuly Nazarbaevqa aıtar alǵysymyz zor. Ekinshi kezekte, rektorymyz Arystan Máýlenuly Ǵazalıevtiń ákelik qamqorlyǵyna degen rızashylyǵymyz mol!».
Kezinde Elbasynyń ózi oqyp, bilim alǵan qara shańyraqta ótken bul ǵıbratty kezdesýdi alǵyspen aptalǵan, rızalyq kóńilmen kúptelgen ıgi shara boldy desek asyra aıtqandyq emes edi. Elbasynyń senimdi seriktesteri jalyndy jastyq shaq – stýdenttik kezderin eske túsirip, umytylmas sátter syılaǵan keshti uıymdastyrǵany úshin ýnıversıtet rektory Arystan Ǵazalıev pen serpindikterge shyn júrekten alǵys aıtty. Al alǵadaı jastar bolsa, erteńgi kúnderine senimniń shamyn jaqqan «Serpin-2050» baǵdarlamasyna, ózderimen kezdesýge arnaıy kelip, aqyl-keńesterin aıamaǵan aıaýly aǵalarǵa degen alǵys sezimderin aqtardy.
Qaırat ÁBILDINOV,
«Egemen Qazaqstan».
QARAǴANDY.