О́skemende óńirlik sarapshylar forýmy ótti. «Dedeman» qonaqúıinde ótken alqaly jıynda Memleket basshysy Nursultan Nazarbaev qabyldaǵan bes ınstıtýttyq reforma men Ult Jospary aıasynda óńirlerdi damytýǵa arnalǵan mańyzdy mindetter talqylandy.
Atalǵan sharany Qazaqstan Prezıdenti janyndaǵy Strategııalyq zertteýler ınstıtýty uıymdastyrdy. Forým jumysyna elimizdiń jetekshi saıasattanýshylary men qoǵam qaıratkerleri, belgili sarapshylar men qoǵamdyq uıymdardyń ókilderi qatysty.
Basqosý barysynda bes ınstıtýttyq reforma sheńberinde óńirlerdi damytýdyń basym baǵyttary saralandy. Atalǵan sharaǵa qatysýshylar jergilikti ózin ózi basqarý júıesin odan ári damytý jáne aımaqtardaǵy ózekti máselelerdi sheshýge yqpal etýde aldaǵy máslıhattar saılaýynyń mańyzdy ekendigin atap ótti.
– Máslıhattarǵa ózindik tabandy oı-pikiri bar jáne ony tıisti orynǵa jetkize alatyn adamdar kelse, jergilikti birqatar máselelerdiń sheshimin tabatynyna senimimiz kámil. Eń bastysy, bılik pen azamattyq qoǵam ózara birigip, kóp máselede ortaq jetistikke jetýge bolady, – dedi saıasattanýshy Berik Ábdiǵalı.
«Eýrazııa álemi» qoǵamdyq qorynyń tóraǵasy Edýard Poletaev jýyrda Elbasy Nursultan Nazarbaevtyń tóraǵalyǵymen ótken Úkimettiń keńeıtilgen otyrysynda qaralǵan sharalardyń sharapatyn aldymen óńirler sezinetinin, ıaǵnı turǵyn úı, qurylys, ınfraqurylym jáne jańa jumys oryndarynyń qurylýy sııaqty jańa ekonomıkalyq ósimmen qamtamasyz etýge oń áser etetinin jetkizdi.
Forým sońynda sarapshylar mundaı basqosýdaǵy pikirtalastar Ult Josparyn is júzine asyrýda óz nátıjesin beretinin jetkizdi. Sondaı-aq, memlekettik reformalardy saraptaý boıynsha ózara is-qımyldy óristete berýge ýaǵdalasty.
Dýman ANASh,
«Egemen Qazaqstan».
О́skemen.