Investısııa kólemi artyp keledi

Keshe Prezıdent janyndaǵy Ortalyq kommýnıkasııalar qyzmetinde el ekonomıkasyna ınvestısııalar tartý sharalary týraly baspasóz máslıhaty ótti. Oǵan «Qazyna Kapıtal Menedjment» AQ ókilderi qatysty. «Báıterek UBH»-nyń júz paıyz enshiles uıymy bolyp tabylatyn «Qazyna Kapıtal Menedjment» AQ basqarma tóraǵasy Almas Aǵybaev pen basqarma tóraǵasynyń orynbasary Dáýren Ońaev atalǵan kompanııanyń el ekonomıkasyna quıǵan ınvestısııalarynyń kólemi jaıynda aıtyp berdi. «Qazyna Kapıtal Menedjment» AQ sońǵy jyldary sheteldik serik­testermen birlesip Qazaqstanda tike­leı ınvestısııalar naryǵyn damy­týmen belsendi aınalysyp ke­ledi. Qazirgi tańda jalpy qorjynda 13 tikeleı ınvestısııalar qory, sonyń ishinde Qazaqstanǵa 300 mlrd. teńgege jýyq ınvestısııa salatyn mindettemesi bar 10 belsendi qor bar», dedi A.Aǵybaev. «Qazyna Kapıtal Menedjment» AQ Prezıdenttiń bastamasy bo­ıynsha 2007 jyldyń mamyrynda qurylǵan bolatyn. Onyń negiz­gi qyzmeti Qazaqstanda tikeleı ınvestısııalardyń tıimdi naryǵyn damytýǵa yqpal etý. «Qazyna Kapı­tal Menedjment» aksıoner re­tinde memleketaralyq qorlar­ǵa qatysady. 2013 jyldyń tamy­zynan beri «Qazyna Kapıtal Me­nedjment» AQ «Báıterek» kompanııalar tobynyń quramynda. 2015 jyly qorlarǵa salynatyn «Qazyna Kapıtal Menedjment» ınvestısııalary 27 mlrd. teńgeni qurasa, 2007 jyldan bastaǵanda «Qazyna Kapıtal Menedjment» qyz­metiniń búkil kezeńindegi barlyq ınvestısııalardyń 35 paıy­zyn qurady. Osy 2015 jylǵy ın­ves­tısııalardyń basym úlesi qazaq­standyq jobalyq kompanııalarǵa salyndy. Iаǵnı, barlyǵy 12 jobaǵa ınvestısııa salynsa, sonyń ishinde 10 jobaǵa Qazaqstanda ınvestısııa salyndy. Sonyń nátıjesinde QKM ınvestısııalyq qorjynyndaǵy qazaqstandyq jobalardyń úlesi 65 paıyzdan asty. «Atqarylǵan jumystardyń sońǵy eki jylynda basqarýshy hol­dıngtiń Qazaqstan ınfra­qury­lymdyq qory, Baiterek Venture Fund, Almex-Baiterek Fund sekildi jal­py mólsheri 42 mlrd. teńge bolatyn qorlar qurý bastamasyn iske asyrdyq. Barlyq strategııalyq portfel ishinen atalǵan qorlardyń úlesi úshten birin quraıdy», dedi kompanııa basshysy. «Qazyna Kapıtal Menedjment» AQ-qa qatysatyn qorlar qyzmet kezeńinde jalpy somasy 1 mlrd. 83 mln. dollar bolatyn 56 jobany qarjylandyrǵan. 2016 jy­ly kom­panııa qazaqstandyq ınfra­qury­lym qoryn aımaqtyq kólem­de keńeıtýge, sondaı-aq, qazaq­stan­dyq jobalarǵa ınvestısııa salý­dyń joǵary qarqynyn artty­rýǵa qatysty jumystardy jalǵas­tyrý­dy josparlap otyr. Dınara BITIKOVA, «Egemen Qazaqstan».