«Talaı ǵasyr jasaı berem áli de...»

Atyraýda Memlekettik syılyqtyń laýreaty, halqymyzdyń birtýar aqyn qyzy Farıza Ońǵarsynovaǵa eskertkish qoıyldy Qazaq poezııasynda eshkim qaıtalaı almaıtyn ózindik órnegi bar aqynnyń eńseli eskertkishi munaıly óńir ortalyǵy – Aty­­raý qalasynda boı kóterdi. Eskertkish qazaq ǵylymynyń zańǵar tulǵasy Qanysh Sátbaev kóshesinde boı kóterdi. Bul kósheniń boıynan azattyqty ańsaǵan Isataı men Mahambet batyrdyń da, qazaqtyń dúldúl kúıshisi Dına Nurpeıisovanyń da, kórnekti ǵalym Qanysh Sátbaevtyń da eskertkishine kózińiz túsedi. Endi sol eńseli eskertkishterdiń qatarynda qazaq poezııasynyń kór­nekti tulǵasy, memleket jáne qoǵam qaıratkeri, Memlekettik syılyqtyń laýreaty Farıza Oń­ǵar­syno­va­nyń da tas tu­ǵyr­daǵy beı­nesi men­mun­dalap turady. Aqyn es­kertkishiniń ashylýyna óńirdiń zııa­ly qaýym ókilderi, aqy­n­nyń týys­tary men jas­tar býy­­ny, jurt­­­shylyq ókil­deri kóptep qa­tys­ty. Qazaqstan jo­balaýshyla­ry ulttyq qaýym­das­­tyǵynyń vı­se-prezıdenti, Qa­zaqstan Res­pýb­lı­ka­synyń eńbek sińir­gen sáýletshisi Serik Rús­tambekovtiń aıtýynsha, aqyn eskertkishin somdaý konkýrs arqyly tańdalypty. Arnaıy jarııalanǵan konkýrsqa aqyn­nyń beınesi somdalǵan 12 joba usynylǵan. Onyń ishinde aqynnyń otyrǵan beınesi somdalǵan nusqa da bolypty. Arnaıy komıssııanyń músheleri keshe óz tuǵyryna ornatylǵan nusqasyna tańdaý jasapty. Eskertkish qoladan quıylǵan, tuǵyrynyń bıiktigi – 4 metr 50 sm, al aqyn beınesi – 4 metr 10 sm. Tuǵyrdyń segiz qabyrǵasy bar, onyń birinde aqynnyń aty-jóni, qalǵan jeteýinde poezııa padıshasynyń óleńderiniń bir shýmaǵy qashalyp jazylǵan. «Aqynnyń týystarymen de aqyldastyq. Olar bizdiń sheberhanamyzda bolyp, shash úlgisine qatysty óz oılarymen bólisti. Músindi Murat Mansurov jasady. Aqynnyń shabyttanyp, jańa jyr jazýǵa umtylyp turǵanyn beıneledik», – dedi sáýletshi Serik Rústambekov. – Byltyrǵy jyldyń aıaǵynda Ánuran avtorlarynyń biri, Memlekettik syılyqtyń ıegeri Jumeken Nájimedenovtiń es­kertkishi ashylǵan edi. Búgin óziniń jyrlarymen de, óziniń adamı bolmysymen de eldiń jadynda jattalǵan aqyn Fa­rıza Ońǵarsynovanyń es­kertkishi ashyldy. Farıza apamyz tek poezııanyń kórnekti tulǵasy ǵana emes, sonymen birge, elimizdiń táýelsizdigin nyǵaıtýǵa da óz úlesin qosqan memleket jáne qoǵam qaı­ratkerligimen tanyldy, – dedi aqyn eskertkishiniń ashylý saltanatynda oblys ákimi Baqtyqoja Izmu­hambetov. Farıza Ońǵarsyno­va­nyń eskertkishiniń aq ja­myl­ǵysyn oblys áki­mi Baq­ty­qoja Iz­­mu­­­ham­­be­tov pen eń­bek ar­da­geri Mel­lıat Sabyrova ash­ty. Aqyn­­nyń tý­ys­tary atynan Aıbek pen Almagúl O­ń­ǵar­syno­va­­lar óz oılarymen bólisip, eskertkishtiń kó­­ńilden shyq­­qa­nyna toq­taldy. Aqyn jyrlary oqy­lyp, sózine ja­zylǵan ánderi shyrqalyp turdy. «...Tirlik za­ńy myqty da, Biraq muny jany barlar uqty ma? Sonyń bárin ýaqyt-jemqor jutty da, Kýási bop qaldym men, Talaı ǵasyr jasaı berem áli de, Eı, adamdar! Barmyn men!» О́z ultyn jan-tánimen súıgen, ultynyń rýhanı keleshegi úshin ólsheýsiz úles qosqan kórnekti tulǵa Farıza Ońǵarsynova es­kert­kishiniń tuǵyrynda segiz qa­byrǵanyń birine dál osy shý­maǵy jazylypty. Iá, aqynnyń ózi jyrlaǵandaı, ol endi talaı ǵasyrlar boıy eldiń jadynan óshpeı, máńgi jasaı beredi. О́ıtkeni, onyń el júregine jattalǵan qaıtalanbas jyrlary da, tas tuǵyrdaǵy beınesi de keleshektiń kóshine bet burdy... Joldasbek ShО́PEǴUL, «Egemen Qazaqstan». ATYRAÝ. Sýretti túsirgen Rahym QOILYBAEV.