Prezıdent janyndaǵy Ortalyq kommýnıkasııalar qyzmetiniń Almaty bólimshesinde jas jýrnalısterdiń «Qalamger Azamat» qoǵamdyq qory elimizde saılaý qarsańynda «Seniń daýysyń – seniń bolashaǵyń!» atty posterler baıqaýy jarııalanyp, búginde baǵyn synaýshylar sany 200 qatysýshydan asyp otyrǵandyǵyn málimdedi.
Konkýrsty uıymdastyrýshylar baıqaýǵa Astana, Almaty, Pavlodar, Jambyl jáne Atyraý aımaǵynyń 18 ben 25 jas aralyǵyndaǵy turǵyndardyń kóptep qatysyp otyrǵanyn jetkizdi. Olardyń aıtýynsha, elimizde memlekettiń bolashaǵy úshin ún qosatyn jastar sany jyl sanap ósip keledi.
EL.KZ áleýmettik jelisinde ashylǵan Sailau2016.el.kz ınternet-alańshasy arqyly bul baıqaýǵa qatysamyn deýshilerge barlyq múmkindikter jasalǵan. Osy áleýmettik júıe arqyly ınternet qoldanýshylar baıqaýǵa kelip túsken týyndylarǵa daýys berip, jeńimpazdy da ózderi irikteıtin bolady. Iriktelgen úmitkerlerdiń ishinen jeńimpazdy Qazaqstan estrada juldyzdary men belgili BAQ ókilderinen jáne shyǵarmashyl jastardan quralǵan ádil qazylar toby anyqtaıdy.
Naýryz aıynyń 18-inde «Seniń daýysyń – seniń bolashaǵyń!» posterler baıqaýynyń jeńimpazdary jarııa etilip, baǵaly syılyqtarmen marapattalady.
Qanat ESKENDIR,
«Egemen Qazaqstan».
ALMATY.