Utymdy ekonomıkalyq saıasat – daǵdarysqa jaýap

Jalpyulttyq sosıal-demokratııalyq partııanyń Almatydaǵy shtabynda partııanyń belsendileri saılaý­shy­larmen kezdesti. Aldymen sóz alǵan partııa jetekshisi Jar­mahan Tuıaqbaı partııanyń saılaýaldy baǵdar­lamasyna toqtalyp, naýqandy jumystyń osy baǵdarlama talaptary aıasynda qyzý júrip jatqanyn aıtyp ótti. Elimiz úshin óndiris áleýetin ishki da­mý maqsattaryna qaraı burý, ınnova­sııalyq ekonomıkaǵa jol ashý kerek degen partııa jetekshisi bul oraıdaǵy oı-tujyrymyn tómendegishe jetkizdi. «Búkil ishki ekonomıkalyq jáne adam resýrstarynyń múmkindigin paıdalanyp, damýǵa sony serpin berý kerek. Qazaqstan – baı memleket. Eń bastysy, sol baılyqtyń talan-tarajǵa salynýyna jol bermeýi tıis. Jemqorlyqqa tosqaýyl qoıylyp, elde bar basqa da rezervterdi durys paıdalaný qajet. Ol úshin Qazaqstanda múmkinshilik zor». Gazet tilshisiniń partııa baǵdar­la­ma­syndaǵy tabystyń belgili bir bóligin qazynaǵa quıý týraly qaǵıdatty shara­larǵa oraı qoıylǵan saýalyna partııa jetekshisi bylaı dep jaýap qaıtardy. – Bul – bıznesmenderge salynatyn salyq emes, asyp-tasqan baılarǵa sa­lynatyn salyq teńgermeli túrde kóbeıýi kerek degen sóz. Ondaı tájirıbe dúnıejúziniń barlyq órkenıetti memleketterinde bar. Tabys neǵurlym kóp bolsa, elge, halyqqa soǵurlym paıdasyn tıgizedi. – Osy talaptarǵa qatysty búginge deıin ún qatqandar bar ma? – Menińshe, oǵan qarsy keletin eshkim joq dep oılaımyn. Bıznesmen Rahym Aıypuly 2007 jyldan beri JSDP-nyń múshesi bolyp tabylady. Qazaqstan Respýblıkasy Parlamenti Májilisiniń depýtattyǵyna kandıdat bizdiń saýalymyzǵa yntasymen jaýap berdi. – Bul partııanyń qataryndaǵy azamattar da ózderin elimizdiń patrıoty sanaıdy. Olardyń qatarynda ózim de barmyn... О́z basym syrtta júrgen qandastarymyzdyń elimizge baǵyttalǵan kóshiniń toqtamaǵanyn qalaımyn. Saılaý dodasyna túsip jatqan alty partııanyń ishinde syrttan kelgen qandastarymyzdan qansha úmitker bar ekeni týraly men aıta almaımyn. Degenmen, Uly kóshti óz basynan ótkizgen azamattardyń Parlament múshesi bolǵany durys dep sanaımyn. Sóz reti kelip turǵanda ózimniń alys­tan kelgen aǵaıynnyń biri ekenimdi aıta keteıin. Tóraǵa men onyń áriptesteri Aıdar Álibaev, Tazabek Sámbetbaı saılaýshylardyń basqa da saýaldaryna jaýap qaıtardy. Talǵat SÚIINBAI, «Egemen Qazaqstan». ALMATY.