«Aýyl» halyqtyq-demokratııalyq patrıottyq partııasynyń saılaý naýqanyndaǵy úgit-nasıhat jumystary Qyzyljar óńirinde de jalǵasyp, top músheleri atbasyn aldymen «Altyn-Arman» ámbebap bazaryna tiredi.
Partııa Tórǵasynyń birinshi orynbasary, Parlament Májilisi depýtattyǵynan úmitker Tolymbek Ǵabdiláshimov saılaýshylarmen kezdesýde saıası uıymnyń saılaýaldy baǵdarlamasynyń basym qaǵıdattaryn túsindirip berdi. «Aýyl dástúrin jańǵyrtamyz!» baǵdarlamasynda eldi mekende turatyn adamdardyń áleýmettik-ekonomıkalyq jaǵdaıyn jańa sapalyq deńgeıge jetkizý, ulttyq qundylyqtar men dástúrlerdi nyǵaıtý, jas urpaqty atalar dástúrimen tárbıeleý joldary jan-jaqty qarastyrylǵan. Respýblıka turǵyndarynyń jartysyna jýyǵy aýyldarda turatynyn eskersek, jumyssyzdyqty eńserý, jańa jumys oryndaryn ashý, shaǵyn jáne orta bıznesti qoldaý, agroónerkásip kesheni salasyn órkendetý múmkindikterin keshendi túrde damytýdyń mańyzy zor, deı kelip, top jetekshisi mal sharýashylyǵy ónimderin óńdeý, sapaly shyǵarý, qaıta óńdeý kásiporyndaryn kóbeıtý arqyly eksporttyq áleýetti arttyrý jaǵdaıyna partııa erekshe mán berip otyrǵanyn atap kórsetti.
«Aýyl» partııasy tarapynan atqarylyp jatqan taǵylymdy ister az emes. Solardyń birine partııanyń uıytqy bolýymen «Jaramdylyq merzimi ótken taýarlarǵa jol joq» atty aksııany ataýǵa bolady. Jer-jerlerde keńinen qoldaý taýyp, ótken jyldyń jeltoqsan aıynan beri jalǵasyp kele jatqan is-shara barysynda saıası uıymnyń jastar qanaty aımaqtardaǵy qoǵamdyq shtabtarmen birlese otyryp, otandyq ónimderdiń sapasy men básekelestik qabiletine monıtorıng júrgizgen. Nátıjesinde eskirgen balalar taǵamdarynyń saýda sórelerine qoıylǵany anyqtalǵan. Bul derekter jınaqtalyp, jergilikti tutynýshylar quqyǵyn qorǵaý departamentterine jóneltilgen. Dúken ıelerine eskertilip, keleshekte qaıtalanbaıdy degen ýádelerin alǵan. Reıd-tekserýler zań aıasynda atqarylyp, turǵyndardyń densaýlyǵyn qamtamasyz etýge, ekologııalyq talaptardy saqtaýǵa aıryqsha basymdyq berilgen.
О́zge de kásiporyndarda ótken júzdesýlerde T.Ǵabdiláshimov halyq densaýlyǵy ult baılyǵy bolyp tabylatynyn, sol sebepti densaýlyq saqtaý, halyqqa medısınalyq qyzmet kórsetý kórsetkishterin sapalyq deńgeıge jetkizý kún tártibinen túspeıtinin alǵa tartsa, saılaýshylar saılaý naýqanyndaǵy úgit-nasıhat toby músheleriniń baıypty áńgimelerin úlken yjdaǵatpen tyńdap, «Jaramdylyq merzimi ótken taýarlarǵa jol joq» respýblıkalyq aksııaǵa belsene qatysatyndaryn málimdedi.
О́mir ESQALI,
«Egemen Qazaqstan».
Soltústik Qazaqstan oblysy.