Álem-jálem álem
Latyn Amerıkasyndaǵy bul eldegi Mar-de-Aho atty kýrortty mekende Táýratta aıtylatyn «qońyzdardyń keń aýqymdaǵy shabýyly» bastalyp ketken.
The Daily Mirror gazetiniń jazýynsha, jaǵajaılarǵa tarpa bas salǵan jándikterdiń sany áldeneshe myńnan asady. Muny mamandar qazir ártúrli qabyldap, baǵalap jatyr. Sonyń ishinde aqyrzamannyń kelip qalǵanyn aıtyp, jurttyń úreıin ushyryp jatqandar da bar. Taǵy bireýler qońyzdardyń jer silkinisinen qashyp kelgenderin alǵa tartady. Al endigi bir pysyq bireýler jándikterdi toptap jınap alyp, onlaın saýdasyn qyzdyryp jatqanǵa uqsaıdy. Olardyń aıtýlarynsha, muny jegender rak, demikpe jáne sýsamyr sekildi keselderden qulan-taza aıyǵyp ketedi-mis.
Gollandııa gúl ósirýshileriniń basty merekesi
Aldaǵy 8 naýryzdy álem áıelderi ǵana emes, sonymen qatar Nıderland eliniń gúl ósirýshileri de ózderiniń jyl ishindegi eń basty merekesi sanaıdy.
Munyń sebebi de túsinikti. Osy mereke qarsańynda jáne sol kúni jurtshylyq tarapynan olar ósirgen alqyzyl qyzǵaldaqtarǵa degen suranys birneshe júz eselep artady. Máselen, eldegi ataqty Naaldvık aýksıonanynda jaı ýaqytta aıyna 20 mln. eýronyń gúlderi satylatyn bolsa, 8 naýryz kúni bul kórsetkish 60 mln. eýroǵa jetedi eken. Al gúlderdi Eýropa men Azııanyń kóptegen elderi tonnalap aldyrady.
30 myń shaqyrymdyq saıahatqa jaıaý attandy
Belarýstiń Grodno qalasynyń turǵyny Sergeı Moroz 4 jylǵa sozylatyn, 30 myń shaqyrymdyq qashyqtyqty túzetin jaıaý sapar úshin jolǵa shyǵyp ketti.
Naýryzdyń birinshi kúni saıahatyn bastap ketken jıhankez 48 aıdyń ishinde Belarýs, Reseı, Mońǵolııa, Qazaqstan, О́zbekstan jáne Qyrǵyzstan marshrýtymen júrip, alty memlekettiń terrıtorııasyna aıaldaýdy josparlap otyr. Tileýlesteri ony Mınskidegi Oktıabr alańynan arnaıy shyǵaryp salypty. Osy kezge deıin kúnine 25 shaqyrym qashyqtyqty baǵyndyryp keledi. Belarýs jigiti jaıaý júrginshiliginiń júriminde, múmkindik bolyp jatsa, Ramzan Kadyrovpen bir kezdesip qalýdy armandaıdy eken.
Ilmıgen ınelik Atlant muhıtyn kókteı ótti
Atlant muhıtynyń ústinen toqtamastan kókteı ushyp ótken quıttaı ınelik ózi tektester arasynda uzaq qashyqtyqqa ushýdan rekord jańartty.
Ineliktiń Pantala flavescens dep atalatyn túrine jatatyn qanatty jándiktiń bul jolǵy saparyn Rýtger ýnıversıtetiniń mamandary arnaıy baqylaýǵa alǵan. Jalpy, ıneliktiń atalǵan túri jeti myńnan astam shaqyrymǵa ushyp bara alatyn kórinedi. Bul jaǵynan ol 5800 shaqyrymǵa jýyq qashyqtyqty quraıtyn Nıý-Iork pen Parıjdiń arasyn jalǵyz ushyp ótken amerıkalyq ushqysh Charlz Lındbergtiń rekordynan da kóp asyp ketip tur.
Iаgr UHL-da jınaǵan upaıy jaǵynan Gordı Hoýmen teńesti
Ulttyq hokkeı lıgasynda óner kórsetetin «Florıda Panters» komandasynyń shabýylshysy Iаromır Iаgr «Kolorado Evelanshpen» kezdesýde bir sátti pas berip, 1850 upaı jınady.
44 jastaǵy cheh hokkeıshisi osylaısha lıgadaǵy matchtarynda jınaǵan upaılary jaǵynan ataqty kanadalyq Gordı Hoýmen teńesti. Sóıtip, lıganyń barlyq ýaqyttardan bergi úzdik shabýylshylar tiziminde onymen birge úshinshi oryndy bólisti. Al birinshi-ekinshi oryndarda Ýeın Gretskı (2857) jáne Mark Messe (1887) esimdi eki kanadalyq hokkeıshi tur.
Erjúrek jigitter eń jyrtqysh akýlalarmen sý astynda kezdesti
AQSh-tyń GoPro kompanııasy kórermender úshin shoýdyń bir túri – erjúrek jigitterdiń sý astynda balǵabasty akýlalarmen kezdesýin tikeleı jazba arqyly kórsetýdi qolǵa aldy.
Mundaı táýekelge barǵan eki sportshy – Djeb Korlıss pen Roberto Manchıno Bagam araldary shoǵyryna jatatyn Bımını aralynyń túbinde osy jobany júzege asyrdy. Olar akýlanyń atalǵan túri qaptap júretin múıiste túsirilim jasatqan. Biraq bularǵa jaqyn kelgen muhıt jyrtqyshtary tıise qoımaǵan. Negizinde balǵabasty akýlalar adam úshin eń qaýiptilerdiń birinen sanalady.
Amerıkalyq fýtbolshy qyz óz mıyn amanat etti
Amerıkalyq fýtbolshy qyz, Olımpııalyq oıyndardyń jeńimpazy jáne álemniń eki dúrkin chempıony Brendı Chesteın jaqynda ósıet jazyp, óziniń mıyn zertteýshilerge amanat etip qaldyrdy.
Jazylǵan ósıetke saı, fýtbolshy qaıtys bolǵannan keıin onyń organdary Boston ýnıversıtetine tapsyrylady. Al ondaǵy oqymystylar qyzdyń basyna udaıy dop tıe bergennen mıy qanshalyqty qozǵalysqa túskenin, onyń densaýlyqqa qanshalyqty áseri bolǵanyn anyqtaıdy. Osy materıaldyń kómegimen dárigerler mundaı jaraqattardan qalaı emdelýge bolatynyn izdestiredi.
Aqparat agenttikteriniń materıaldary
negizinde daıyndaldy.