Munaıshy Zınat

Munaıshylardyń arasynda da názik jandylar az emes. Solardyń biri –Zınat Úmitaeva. Onyń balalyq shaǵy munaıshylar ortasynda ótipti. О́ıtkeni, ákesi Jumabaı Komsomol munaı kásipshiliginde 1941 jyldan eńbek etipti. Surapyl soǵys bastalǵan jyly Jumabaı da munaı kásipshiligin elektr energııasymen qamtý úshin jumysqa jiberilgen eken. Sol kezden beri taban aýdarmaı munaı-gaz ónerkásibinde eńbek ete júrip, balalaryn da osy kásipke baýlypty. Tań bozaryp ata bastaǵannan top-tobymen munaı uńǵyma­laryna bettep bara jatatyn munaıshylardy kúnde kóre­tin Zınat ta bala kezinen «qa­ra altynnyń» ıisin sezinip ósken. Ras, Reseıdiń Astrahan óńirinde kindik qany tamǵan, keıin sol qaladaǵy oqý ornynan medısınalyq bilim alǵan anasy Saǵıpa qyzynyń dárigerlikti ne, muǵalimdikti tańdaǵanyn qalaǵan eken. Alaıda, óziniń balalyq shaǵy ótken Komsomol kentindegi barlyq balanyń «kindik she­shesi» atanǵan anasynyń emes, munaıshylarmen birge «qara altyn» selin tasytqan ákesiniń shejireli jolyn jalǵastyrýǵa beldi bekem býypty. Buǵan bir kóshede kórshi turǵan Baǵyt Aýnııazovanyń joǵary oqý ornynda geolog mamandyǵyna oqyǵany da áser etkenin jasyrmaıdy. «Tabıǵı baılyqty bári jer astynan shyǵady. Jerdiń astynda ne baryn bilý úshin geolog bolý kerek. Tipti, munaı óndirý úshin de aldymen geologııalyq zertteý júrgiziledi. Jer astynyń qyrtysyn, onda qandaı tabıǵı baılyq baryn tek geolog qana anyqtaı alady», dep Zınatty osy mamandyqqa qyzyqtyrǵan eken. Otbasyndaǵy bes balanyń biri bolyp ósken Zınattyń 1975 jyly mektep bitirisimen munaı kásipshiliginde alǵashqy eńbek jolyn bastaýǵa talpynysy nátıjeli bolypty. Keıin Almatydaǵy burynǵy Lenın atyndaǵy Qazaq polıtehnıkalyq ınstıtýtynda oqyp, taý-ken ınjeneri mamandyǵyn ıgeripti. Sóıtip, ózi eńbek jolyn bastaǵan «Dossormunaıgaz» basqarmasyna qaıta oralǵan. Qazir Altykól munaı daıyndaý jáne tasymaldaý sehynda eńbek etedi. Basqarma basshylary óz isin jaýapkershilikpen atqaratyn Zınatqa senim artyp, sehtyń sheberi etip bekitipti. Onyń osy jumysty atqarǵanyna 35 jyldan asyp barady. – Ákem bala kezimde Dossor­dyń munaıynyń sapasy óte joǵary, jaýǵa qarsy jer talǵa­maı júretin tankke janarmaı retinde jiberildi dep otyrýshy edi. «Bizdiń jerimizde munaı mol, urpaqtan urpaqqa jetedi» deıtin. «Tek bilgir munaıshy bolý úshin erinbeı izdený, eńbektený qajet», degeni de este ákemniń. «Bul kásiptiń qıyndyǵy kóp: qystyń qaqaǵan aıazy men jazdyń aptabyna shydap, aldymen adamdarmen til tabysa bilseń, árbir sátińdi, árbir kúnińdi eldiń ıgiligi úshin jumsasań ǵana abyroıǵa bólenesiń», degenin jadyma túı­dim, – deıdi munaı daıyndaý jáne tasymaldaý sehynyń sheberi Zınat Úmitaeva. – Ákeniń sol amanatyna adal bolýǵa talpyndym. Nurı Nurjanov, Baı­ǵabyl Amanǵalıev syndy ákemmen zamandas aǵa býyn mu­naıshylardyń táliminen, táji­rıbesinen úı­rengenimdi kún­­delikti jumysymda paıdalanyp otyramyn. Shúkir, árip­testerimniń arasynda aby­roı­lymyn. Qazir ózimniń baýlyǵan shákirtterim de bar. – Elimiz táýelsizdigin alǵaly beri munaıshylardyń ahýaly jaqsardy. Burynǵydaı emes, ken orny zaman talabyna saı jabdyqtalǵan. Munaı daıyndaý jáne tasymaldaý úderisi kompıýtermen baqylanady, – deıdi otbasynda munaıshylar áýletiniń otanasy, ken ornynda Zınat Úmitaeva. – Eń bastysy, el ekonomıkasynyń órkendeýine úlesimdi qosyp júrge­nimdi maqtan tutamyn. Balala­rymyzdy da Otanǵa adal eńbek etýge tárbıeledik. Joldasbek ShО́PEǴUL, «Egemen Qazaqstan». Atyraý oblysy, Maqat aýdany.