Árıne, Taraz qalasynda kelgen qonaqtarǵa kórsetetin ádemi jerler óte kóp. Keshe ǵana ótken Qazaq handyǵynyń 550 jyldyq mereıtoıynan keıin kóne shahar tipten shyraılanyp shyǵa keldi. Áıtse de tarazdyqtar bul qalaǵa kelgen qonaqtardy qaıtse de «Jasulan» JShS-niń «Qysqy baq» gúlzaryna aparýǵa tyrysady. О́zim de bul gúlzardy tamashalaýǵa qanshama jandardy apardym, jumaqqa uqsaıtyn osynaý kók jasyl álemge solardyń tańǵalmaǵany kemde-kem. Qaıbir jyly Elbasy N.Nazarbaev ta bul keshenge arnaıy bas suǵyp, gúl ósirýmen aınalysatyn seriktestiktiń jumysyna dán rıza bolǵan-dy.
Búginde bul gúlzarda 300-ge tarta áıel gúlderdi kútip-baptaýmen aınalysady. Iаǵnı, jurtshylyqqa jyl on eki aı boıyna gúl syılaıtyn qyz kelinshekter, mine, osylar. Gúl – ádemilik ólsheminiń shyńy. Sulýlyq pen tazalyqtyń belgisi. Endeshe «Qysqy baq» gúlzaryndaǵy qyz-kelinshekter jurtqa osyndaı izgilik shýaǵyn syılap júrgen jandar dep aıtýǵa bolady. Gúl – sezimderdi pash etedi. Al bir ujymda qyzmet etetin 300-ge tarta qyz-kelinshek ózderi kútip-baptaıtyn gúlderdiń boıyna osyndaı bar meıirim-shýaǵyn sińirip júr. Sodan da bolar, kóktem merekesiniń sán saltanatyna aınalǵan gúlder qushaqtardy qýanyshqa toltyryp, kóńilderge qushtarlyq syılaıdy.
Syrtta kóktemniń kókózek shaǵy. Al, shýaq lebi esken jylyjaıda gúldiń júzdegen túri sheshek atyp, jaıqalyp tur. Gúlzardyń qyzmetkerleri kúndiz-túni kezektesip, japyraq jaıyp kele jatqan gúlderdiń jaǵdaıyn jasaıdy. Iаǵnı, tynymsyz tirlik munda jyl boıyna jalǵasady. Sheshek atqan gúlderdiń alǵashqy oramy qazir saýda oryndaryna jóneltilip jatyr.
– Gúl degenimiz kishkentaı názik bala sııaqty. Jaqsy kóńil-kúımen qarasańyz gúl de jaınap turady. Meıirim, shapaǵat kerek bularǵa. Jyly sóz aıtsań, jaıqalyp shyǵa keledi. Gúldiń aınalasyna, odan keıin adamǵa degen áseri óte mol. Sebebi, gúlden adam nár alady. Gúl turǵan jerde bıik sezim paıda bolady. Erekshe sulýlyqty sezinedi, – deıdi «Qysqy baq» gúlzarynyń basshysy Jumagúl Omarova.
Naýryz kelgeli gúlzarda qyzý tirlik. Gúl arqyly meıirimdilik pen mahabbat, qýanysh pen iltıpat sezimin jetkizgisi kelgenderdiń qarasy kóp. Tátti sezimderdiń jarshysy bolǵan alqyzyl gúlderdiń destesi myńdaǵan qyz-kelinshektiń kóńilin tasytyp, qýanysh qushaǵyna bólep jatyr.
Oralhan DÁÝIT,
«Egemen Qazaqstan».
Jambyl oblysy.