ASTANA. 7 naýryz. Aımaq basshysy Qyrymbek Kósherbaev naýryz aıynyń alǵashqy aptasynda óńirdegi 7 aýdan men Baıqońyr qalasyn túgel aralap shyqty. Turǵyndarmen kezdesip, kúrmeýi qıyn máselelerdi kózben kórdi. Sapar barysynda 30-dan astam túrli nysandardyń jumysymen tanysty. Bul týraly oblys ákimdiginiń baspasóz qyzmetine silteme jasaǵan egemen.kz tilshisi habarlady.
Aldymen oblys ákimi Jańaqorǵan aýdanyna qarasty Tómenaryq aýyldyq okrýginde bolyp, turǵyndarmen kezdesti. Onda aýyl halqy eldi mekenge jańa mekteptiń qajettigin Qyrymbek Kósherbaevqa jetkizip, osy problemany nazarǵa alýyn surady. Aımaq basshysy apatty jaǵdaıda dep tanylǵan №223 mektepke jańa ǵımarat jyl sońyna deıin salynatynyn málimdedi. Sondaı-aq, óńir basshysy osy aýdandaǵy Aqqorǵan aýyldyq okrýginde de jańa mektep boı kóteretinin aıtty. Al bıyl Shıeli aýdanyna qarasty Telikól aýylyndaǵy jańa bilim oshaǵy paıdalanýǵa beriledi. Búginde 300 oryndyq mekteptiń qurylysy júrgizilip jatyr. Jalpy oblysta 11 appatty jaǵdaıdaǵy mektep bar. Bul bilim nysandarynyń qurylysy memlekettik-jekemenshik áriptestik negizinde júrgiziletin bolady.
Aýdandarda jaǵymdy jańalyqtar da jeterlik. Máselen, Aral aýdanyna qarasty Qarashalań aýlynda «Qarashalań balyq servıstik-daıyndaý ortalyǵy» jumysyn bastady. Zaýyttyń jyldyq balyq óńdeý qýattylyǵy 3000 tonnaǵa eseptelgen. Munda 50-den astam jergilikti turǵyn turaqty jumyspen qamtylǵan.
«Qambash» balalardy saýyqtyrý jáne qosymsha bilim berý ortalyǵy jyl on eki aı jumys jasaıdy. Bıylǵy oqý jylynyń ózinde 500-den astam jetkinshek osynda bilimderin jetildirdi. Nátıjesi de jaman emes. Qazirgi tańda ortalyqta 75 oqýshy synaqqa qyzý daıyndalýda.
Al Qazaly temirjol aýrýhanasy tolyqtaı jańa medısınalyq quraldarmen jabdyqtaldy. Sondaı-aq, Qarmaqshy aýdanynda zamanaýı talapqa saı avtobekettiń qurylysy júrgizilýde. Onyń qasynan talapqa saı jańa bazar salynady. Kúzdi kúnderi dıqandar jaz boıǵy eńbekterin esh deldalsyz osynda ákep satýǵa tegin oryn beriletin bolady. Sonymen qatar, aýdanda ındýstrıaldy aımaqqa ınfraqurylym tartý jumystary qarqyndy. Bul jumystar mamyr aıynyń aıaǵynda tolyq aıaqtalady. О́ndiris aımaǵyna qazirdiń ózinde 10-nan astam jobaǵa arnalǵan zaýyttar salýǵa jergilikti kásipkerler nıet tanytyp otyr.
Al Syrdarııa aýdanynda aýyz sý máselesi tolyq sheshimin tapqan. Tipti Tereńózekte káriz júıesi tartylyp, oblys boıynsha kommýnaldyq máseleleri tolyq sheshimin tapqan alǵashqy aýdan. 2015 jyldyń qorytyndysy boıynsha kommýnaldyq tólemderge de qaryzsyz shyqqan.
«Jer betinde bolyp jatqan barlyq jaǵdaı bizge de áser etpeı qoımaıdy. Jańa zamannyń jańa shaqyrtýlaryna jaýap beretin bolýymyz qajet. Ol úshin jańa tehnologııalardyń meńgerip, judyryqtaı jumyla jumys jasaýymyz kerek. Jylyna 200-ge jýyq stýdentterimizdi Reseıdiń esebinen kórshi eldiń mańdaıaldy oqý oryndarynda bilim alýda. Bir-eki jyldyń kóleminde aldyńǵy lektegi stýdentter elge maman bolyp oralady», – dedi aımaq basshysy Qyrymbek Kósherbaev.
Aıta keteıik, barlyq aýdandarda issaparda bolǵan oblys ákimi turǵyndardyń ótinishteri men kótergen máseleleri kezeń-kezeńimen sheshiletinin jetkizdi.
Talǵat Raıymbek.
Derek, sýret: oblys ákimdiginiń baspasóz qyzmeti.