ASTANA. 9 naýryz. Keshe, ıaǵnı, seısenbiden sársenbige qaraǵan túnde fýtboldan ÝEFA Chempıondar lıgasynyń 1/8 fınaly sheńberinde eki qarymta kezdesý ótti. Nátıjesinde óz alańdarynda jeńiske jetken Germanııanyń «Volfsbýrgi» men Ispanııanyń «Realy» (Madrıd) týrnırdiń shırek fınalyna joldama aldy. Bul týraly egemen.kz tilshisi habarlady.
«Volfsbýrg» (Volfsbýrg, Germanııa) – «Gent» (Gent, Belgııa) 1:0 (3:2)
Gol: Andre Shıýrrle 74.
Birinshi oıynda 3:2 esebimen jeńiske jetken «Volfsbýrg» bul kezdesýde de basymdyǵyn anyq baıqatty. Tolassyz shabýyldaǵan nemister oıyn barysynda qarsylastar qaqpasyna 15 ret soqqy jasasa, «Gent» fýtbolshylary 6 márte Koen Kastelstiń ıeligin nysanaǵa alyp kórdi.
Birinshi taımda saýatty qorǵanyp, laıyqty qarsylasa bilgen belgııalyqtar ekinshi taımda bosańsyp qaldy. Sony paıdalanǵan alań ıeleri 74-mınýtta Andre Shıýrrleniń kómegimen esep ashyp, jeńis golyn soǵyp ketti.
Osylaısha eki matchta da jeńiske jetken «Volfsbýrg» Chempıondar lıgasynyń shırek fınalyna alǵashqylardyń biri bolyp joldama aldy.
«Real» (Madrıd, Ispanııa) – «Roma» (Rım, Italııa) 2:0 (2:0)
Goldar: Krıshtıaný Ronaldý 64, Hames Rodrıges 68.
Italııa astanasy – Rım qalasynda ótken qos komanda arasyndaǵy alǵashqy kezdesýde madrıdtikterdiń 2:0 esebimen jeńiske jetkeni belgili. Sondyqtan bul oıynda «Realdyń» favorıt bolǵany sózsiz. Desek te, Krıshtıaný Ronaldý bastaǵan jigitter birinshi taımda gol soǵa almady.
Al ekinshi taımda ıspanııalyqtar eki gol soqty. Aldymen, 64-mınýtta Ronaldý mergendigimen kózge tússe, 68-mınýtta Hames Rodrıges esepti eseledi.
Nátıjesinde eki oıynda da 2:0 esebimen jeńiske jetken «Real» jarysty jalǵastyrý múmkindigine ıe boldy.
Aıta keteıik, búgin, ıaǵnı, 9 naýryzdan 10-yna qaraǵan túnde atalǵan týrnır sheńberinde taǵy eki qarymta kezdesý ótedi. Atap aıtqanda, Reseıdiń «Zenıti» óz alańynda Portýgalııanyń «Benfıkasymen» kezdesse, Anglııanyń «Chelsıi» Fransııanyń PSJ-syn qabyldaıdy. Bul oıyndar Astana ýaqytymen saǵat túngi 01:45-te bastalady.
Elaman Qońyr.
Derek: egemen.kz.
Sýret: championat.com.