ASTANA. 9 naýryz. «Astana» fýtbol klýby «Astana» prezıdenttik klýbymen birlesip, komandanyń oıyndaryna bılet satýdyń qolaıly júıesin ázirledi. Bul týraly egemen.kz tilshisi habarlady.
Endi jankúıerler bıletterdi táýligine 24 saǵat, dúnıejúziniń kez kelgen jerinen ınternet, telefonnyń mobıldik qosymshasy jáne elimiz boıynsha ornatylǵan termınaldar arqyly alýǵa bolady.
Bul «Astana» klýbynyń mádenı-buqaralyq is-sharalarǵa bılet satýshy «Tıketon» jelisimen birigip jasalyp otyr. Maýsymnyń alǵashqy matchtarynan bastap, fýtbol súıer qaýym úshin bıletter on-laın tártibinde «Tıketon» (ticketon.kz saıty nemese mobıldik qosymshalary) arqyly, klýbtyń saıtynda (fca.kz), sonymen qatar «Tıketon» seriktesteriniń kómegimen sports.kz jáne vesti.kz, nur.kz, zakon.kz, jam.kz, afisha.kz, yvision.kz jáne basqa da saıttarda, Qazaqstannyń oıyn-saýyq ortalyqtarynda, Qiwi jáne Kassa24 termınaldary arqyly satylady.
Birinshiden, oıyndy jáne «Astana Arena» stadıonynyń kez kelgen sektorynda qalaıtyn oryndy tańdaý kerek. Tólemdi júzege asyrǵannan keıin bılettiń ózi uıaly telefonǵa jáne elektrondyq poshtaǵa joldanady. Stadıonǵa ótý úshin jankúıer tek qaǵaz betinde basylǵan elektrondyq bıletti kórsetedi.
Fýtbol klýbynyń ákimshiligi atap ótkendeı, fýtbol matchtarynda bıletterdi on-laın tártibinde ǵana emes, «Astana Arena» stadıonynyń kassalarynda da oıyn bolǵan kúni alýǵa bolady.
Bılet aqysy 200 teńgeden bastap 2000 teńgege deıin, sektorǵa baılanysty. 7 jasqa deıingi balalar úshin kirý tegin. Sonymen qatar 7-16 jas aralyǵyndaǵy jetkinshekter, stýdentter men zeınetkerler úshin olardyń zeınetkerlik kýálik, týý týraly kýálik, stýdenttik bılet bolsa bılettiń baǵasy 50 paıyz kóleminde jeńildikpen satylady.
Buǵan qosa, maýsymdyq abonementter de satýǵa shyǵarylady. Onyń baǵasy 3500 teńgeden bastap 34000 teńgege deıin bolady. Abonement alǵan adam Premer Lıganyń 16 oıynyn, Qazaqstan Kýbogynyń barlyq jergilikti oıyndaryn, sondaı-aq Chempıondar lıgasynyń kvalıfıkasııalyq raýndtarynyń eki oıynyn tamashalaı alady.
Bıletterdi satyp alý máseleleri boıynsha «Tıketon» kompanııasyna myna 8 7172 4763 50, 8 777733 53 53 telefondar arqyly habarlasýǵa bolady:
Dastan Kenjalın.
Derek, sýret: «Astana» fýtbol klýby.
[caption id="attachment_28330" align="aligncenter" width="560"] Dlıa Interneta[/caption]