ATYRAÝ. 9 naýryz. Búkil álem halyqaralyq áıelder kúni merekesin atap ótken kúni tań ata Atyraýǵa «Máńgilik El» áleýmettik poıyzy keldi. Poıyz quramyndaǵy ár sala ókilderin oblys ákiminiń orynbasary Shyńǵys Muqan bastaǵan jergilikti bılik ókilderi qarsylap aldy. Bul týraly egemen.kz tilshisi habarlady.
Temirjol vokzaly aldynda «Án sherý» atty patrıottyq ánder shyrqalyp, shaǵyn mıtıng te ótkizildi. Onda «Máńgilik el» poıyzynyń shtab jetekshisi Ámirjan Álpeıisov el óńirlerin aralaýdaǵy maqsattyń negizgi basymdyqtaryna toqtala kelip: «Bizdiń poıyzdyń quramynda 30-ǵa tarta medısına qyzmetkeri bar. Olar tek qabyldaý júrgizip qoımaıdy, sonymen birge, joldama beredi. Kvota alý máselesine de kómektesedi. Olardyń arasynda jergilikti jerde kezdespeıtin kardıologtar, onkologtar, balalar dárigerleri bar. Bulardyń bári de shetelderde taǵylymdamadan ótken, jańa tehnologııalarmen jumys isteýdi meńgergen, qazir Astana men Almatydaǵy klınıkalar men ǵylymı ortalyqtarda jumys isteıtin bilikti mamandar. Poıyz quramynda osylar sekildi ár salalyq mınıstrlikterdiń bilikti mamandary da keńes beredi», – dep málim etti.
«Máńgilik El» poıyzy quramyndaǵy salalyq mınıstrlikter ókilderi top-topqa bólinip, ózderine júktelgen mindetterin atqarýǵa kiristi. Máselen, 30-ǵa jýyq bilikti mamandardan quralǵan dárigerler toby «Temirjol gospıtali» AQ aýrýhanasynda ártúrli syrqaty bar jergilikti turǵyndardy qabyldap, keıbirine dárigerlik keńester berdi. Al poıyz jetekshisi Ámirjan Álpeıisov bastaǵan top Atyraý munaı jáne gaz ınstıtýtynyń stýdentter saraıyna jınalǵan óńir jastarymen júzdesti. Munda joǵary oqý oryndarynda oqıtyn stýdent-jastardyń qatysýymen «Meniń jetistikterim –Táýelsizdik jetistikteri» atty aksııa ótti.
«Ata-babadan qalǵan ulan-ǵaıyr Uly Dala Eliniń keleshegi ulttyq qundylyqtarynan tálimdi tárbıe alǵan bilimdi, bilikti jastarymyzdyń belsendiligimen kemeldene túsedi. Shúkir, elimiz táýelsizdik alǵaly beri jan-jaqty órkendep, álemge tanyldy. Sonyń ishinde, jastarymyzdyń shetelderdegi tańdaýly ýnıversıtetterde bilim alýyna da keń jol ashyldy», – dedi «Máńgilik El» poıyzynyń jetekshisi Ámirjan Álpeıisov. – Elbasy Nursultan Nazarbaevtyń ustanar basty saıasaty – elimizdi álemdegi damyǵan 30 eldiń quramyna engizý. Bul úshin árıne, eń mańyzdysy otandyq ekonomıkany ártaraptandyra órkendete berý bolsa, oǵan jastardyń da qosatyn úlesi mol bolýy tıis».
Munaıly óńirdegi 17 etnomádenı birlestikterdiń bas qosatyn ortaq shańyraǵyna aınalǵan «Dostyq» úıinde memlekettik etnosaıasat máseleleri men qoǵamdyq kelisimdi, tózimdilik mádenıetin jáne ultaralyq qatynastardy qalyptastyrý máseleleri boıynsha semınar-trenıng ótti. Etnomádenı birlestikterdiń qatysýymen «Máńgilik El – Bolashaǵy birtutas ult» atty leksııa-tanystyrylymynyń mańyzy tipten aıryqsha deýge bolady. «Qazaqstan – kóp etnosty bir shańyraq astynda toǵystyrǵan, sonymen birge, birligi men dostyǵy nyǵaıǵan memleket» dep óńirdegi etnomádenı birlestikter ókilderimen kezdesýde oı túıindegen áleýmettik poıyz jetekshisi Ámirjan Álpeıisov Atyraý oblysynyń kitaphana júıesine ondaǵan kitapty tartý etti. Onyń ishinde Qazaqstan halqy assambleıasynyń qurylý tarıhy týraly «Odna ıstorııa, odna sýdba», kindik kesken atamekeninen elimizge jer aýdarylǵandar derekteri toptastyrylǵan «Iz ıstorıı deportasıı. Kazahstan. 1935-1939 g.g.» sekildi sırek kitaptar bar.
«Mundaı kitaptar elimizdiń tarıhyn, Qazaqstandy meken etken ózge de etnostar tarıhyn tereńirek bilýge múmkindik beredi», – dep málim etti ol.
Sonymen birge, áleýmettik poıyz quramyndaǵy salalyq mınıstrlikter ókilderi zııaly qaýymmen de, isker top ókilderimen de aqjarma kezdesýler ótkizdi. Máselen, jumysqa ornalasý men áleýmettik áriptestik, memlekettik qyzmet usyný máseleleri boıynsha keńes, memlekettik satyp alýdy uıymdastyrý boıynsha tapsyrys berýshilermen semınar uıymdastyryldy. «Máńgilik El» poıyzynyń jetekshisi Ámirjan Álpeıisov málim etkendeı, poıyzdyń óńirlerdi aralaýdaǵy maqsaty – halyqtyń áleýmettik máselelerin sheshýge atsalysý.
«Áleýmettik máselelerdiń túıindi tustary kóbinese aýyldarda kezdesip jatady. Máselen, medısına salasy qyzmetkerleriniń jalaqysy 30 paıyzǵa kóterilýi tıis edi. Biraq, kerisinshe, olardyń jalaqysynyń azaıyp ketken tustary bar. Biz osyndaı máselelerdiń sheshilýine yqpal etýdi kózdedik», – deıdi Ámirjan Álpeıisov. – Eń negizgi maqsat – el Táýelsizdiginiń 25 jyldyq mereıtoıyn shaǵyn eldi mekenderde, shaǵyn qalalarda atap ótýdi bastaý».
«Máńgilik El» áleýmettik poıyzynyń músheleri budan keıin Maqat aýdanynda kezdesýler ótkizip, Aqtóbe oblysyndaǵy Shalqar aýdanyna attanyp ketti.
Joldasbek Shópeǵul.
Derek: egemen.kz.
Sýret: Rahym Qoılybaev.