ORAL. 9 naýryz. Memleket basshysy Qazaqstan halqy assambleıasynyń Táýelsizdiktiń 25 jyldyǵyna arnalǵan «Bizdiń kúshimiz – birlikte» atty respýblıkalyq forýmyna qatysty. Bul týraly akorda.kz habarlady.
Is-sharaǵa 3000-ǵa jýyq adam qatysty, olardyń qatarynda Qazaqstan halqy assambleıasynyń ókilderi, respýblıkalyq jáne óńirlik etnomádenı birlestikterdiń músheleri, ǵylymı jáne shyǵarmashyl zııaly qaýym, jastar bar.
Elbasy forýmǵa qatysýshylarǵa arnaǵan sózinde búginde elimiz boıynsha 962 etnomádenı birlestik jumys júrgizip otyrǵanyn atap ótti.
«Osynyń bári barlyq azamattar úshin Qazaqstannyń týǵan úıindeı bolyp sanalatynyn aıǵaqtaıdy. HH ǵasyr barshaǵa, sonyń ishinde Qazaqstan jerinde pana tapqan qonys aýdarýshylar men kúshtep jer aýdarylǵandarǵa qıyn tıdi. Byltyr jyl boıy atalyp ótken Assambleıanyń 20 jyldyǵy birtutas Otanymyzdyń jáne balalarymyzdyń bolashaǵyn Qazaqstan halqy birge qalyptastyryp jatqanyn kórsetti. Birge ómir súre otyryp, biz bir-birimizdi rýhanı turǵydan baıyta túsemiz. Bizdiń halqymyz tatýlyq pen kelisimniń biregeı saıasatymen, dostyq negizdegi kórshilestikke beıimdigimen, turaqtylyq pen tynyshtyqqa umtylysymen maqtana alady», – dedi Qazaqstan Prezıdenti.
Nursultan Nazarbaev elimizde barlyq mádenıetter men tilderdiń teń quqyly damýy, tarıhı dástúrler men ǵuryptardyń órkendeýi qamtamasyz etilgenin aıtty.
«Bul oraıda Qazaqstan halqy assambleıasynyń róli zor. Osy jyldar ishinde ol eldegi etnostardy jaqyndastyrdy, árbir mádenıettiń ozyq úrdisterin pash etti. Bir qaraǵanda ár etnostyń dástúri bir-birine uqsamaǵanymen, olardyń túpki máni bir. Ártúrli atap júrsek te, etnıkalyq merekelerdiń ýaqyty men sebepteri úılesip turady. Biz barlyq etnostardyń merekelerine yqylaspen qatysamyz, óıtkeni qazaqstandyqtar birliktiń, beıbitshiliktiń, tynyshtyqtyń, baqyt pen meıirimniń aıryqsha rýhyn qalyptastyra bildi», – dedi Memleket basshysy.
Qazaqstan Prezıdenti elimiz 100-den asa etnos pen 17 konfessııa ókilderiniń jaıly ómir súrýine barlyq jaǵdaı jasalǵan zamanaýı ári qaýipsiz ortaq shańyraq bolyp otyrǵanyna nazar aýdardy.
«Olar ana tili men tarıhyn oqıdy, óz dinderin ustanady, ulttyq dástúrleri men ádet-ǵuryptaryn saqtaıdy. Bizdiń gazet-jýrnaldarymyz 15 tilde shyǵady, al teatrlarymyz 7 tilde sóıleıdi. Barlyq oblysta kishi Assambleıalar tıimdi jumys isteıdi. Qazaqstandyqtardyń tatýlyǵy men kelisimi – qoǵamdy uıystyrýshy kúsh. Kópulttylyq eldiń strategııalyq artyqshylyǵy ekenin biz is júzinde dáleldedik. Assambleıanyń jastarmen jumysqa kóbirek kóńil bóle bastaǵany óte mańyzdy. Naq osy jastarǵa ómirlik aıqyn baǵdar berý kerek, olardy kúmándi ıdeıalardyń yqpalynan qorǵaý qajet», – dedi Nursultan Nazarbaev.
Memleket basshysy búginde kóptegen elderdegi jaǵdaıdyń zorlyq, etnıkalyq alalaý, túrli soǵystar men qaqtyǵystar sııaqty eń qaıǵyly ssenarııler boıynsha órbip jatqanyn aıtty.
«Osyndaı jaǵdaıda árbir qazaqstandyq tatýlyq pen qoǵamdyq kelisimniń shynaıy baǵasy qandaı ekenin, dıalog, bir-birine degen qurmet, tózimdilik pen toleranttylyq jolyn tańdaý arqyly qandaı qaıǵy-qasiretterden aman qalǵanymyzdy jete sezine bastady. Bizdiń tájirıbemizdi endi ózge memleketter zerttep, paıdalanýda. Qazaqstannyń bolashaǵy zor. Biz sizdermen birge barlyq qıyndyqtardy eńseremiz, alǵa jyljý úshin memleket barlyq sharany iske asyrady», – dedi Qazaqstan Prezıdenti.
Nursultan Nazarbaev Oral qalasy elimizdiń jarqyraǵan jaquty ekenin atap ótti.
«Batys Qazaqstan oblysy Eýropa men Azııa arasyn baılanystyrýshy óńir retinde bizdiń ekonomıkamyzda árdaıym mańyzdy ról atqaryp keledi. О́ńir orasan zor tranzıttik áleýetke ıe, biz ony damyta túsetin bolamyz. Búkil Qazaqstandaǵy sııaqty munda daǵdarysqa qarsy jumys jaqsy júrip jatqanyn kórip otyrmyn. Álemdik naryqtaǵy turaqsyzdyq jaǵdaıynda oblys áleýmettik mańyzy bar 33 taýardyń 24 túrin óndirip otyr. Indýstrııalandyrýdyń birinshi besjyldyǵy aıasynda 32 joba júzege asyrylyp, 2 myń jumys orny ashyldy. Sizderdiń óńirlerińizde Oral transformator zaýyty, «Kvant» jıhaz fabrıkasy, «Batys Marka Lamb» et óńdeý kásiporny sııaqty iri kásiporyndar bar. «Nurly jol» baǵdarlamasy boıynsha taǵy 40 joba júzege asyrylyp, 2 myńnan astam jumys ornymen qamtamasyz etetin bolady», – dedi Memleket basshysy.
Qazaqstan Prezıdenti mektepke deıingi mekemelermen qamtý deńgeıi óńirde 98 paıyzǵa jetkenine, turǵyn úıler salynyp jatqanyna nazar aýdardy. Búginde úsh aýdanda jalpy uzyndyǵy 500 shaqyrymǵa jýyq avtomobıl joly salynyp, oblystaǵy barlyq derlik eldi mekender gazdandyryldy.
Nursultan Nazarbaev elde júrgizilip jatqan sharalar qarapaıym adamdardyń ál-aýqatyn arttyrýǵa baǵyttalǵanyn aıtty.
Sońynda Memleket basshysy óńir turǵyndaryna ıgilik pen baq-bereke tiledi.
Forým barysynda Qazaqstan halqy assambleıasynyń jáne onyń janyndaǵy Analar keńesiniń músheleri, etnomádenı birlestikterdiń basshylary sóz sóıledi.
Sondaı-aq, forým aıasynda etnomádenı birlestikterdiń shyǵarmashylyq ujymdarynyń qatysýymen merekelik konsert ótti.
Temir Qusaıyn.
Derek, sýret: akorda.kz.