Belsendilik kórsetýge shaqyrdy

Parlament Májilisi men barlyq deńgeıdegi máslıhattar saılaýlarynyń naýqany márege jaqyndap keledi. Oblystaǵy barlyq 818 saılaý ýchaskesinde tynymsyz jumystar jalǵasyp jatyr. Olarǵa saılaýshylar jıi kelip, saılaý naýqanyna, daýys berýge qatysty túrli suraqtaryna jaýap alady. Qazir ýchaskelerdiń barlyǵy da saılaýdy ótkizýge daıyn. Degenmen, saılaý kúni jaqyndaǵan saıyn oblystyq saılaý komıs­sııasy daýys berý erejesin saılaý­shy­lar­dyń nazaryna bir pysyqtap alýdy jón kóripti. Osyǵan oraı olar buqaralyq aqpa­rat quraldary ókilderin shaqyryp, saı­laý kúni daýys berý erejesi týraly aıtyp berdi. – Qazaqta «toıdyń bolǵanynan boladysy qyzyq» degen sóz bar. Saıası naýqan kezinde saılaý ýchaskelerinde belsendi, qyzý jumystar júrgizildi. Bul naýqanda saılaýshylar óziniń qalaýly depýtattaryn tańdap alady, sondyqtan bul saılaý elimizdegi demokratııanyń qadamyna da syn ári úles bolary belgili. Ol úshin barynsha ádilettilik saqtalýy tıis. Saılaýshylarǵa az ǵana kún qaldy, daýys berý erejesin taǵy da saılaýshylardyń esine salyp qoıǵandy jón kóremiz, – dedi jýrnalıstermen kezdesýinde oblystyq saılaý komıssııasynyń múshesi Qaıyrhan Jumabaev. – Saılaýdyń ádil ótýi zań arqyly bekitilgen erejeniń saqtalýyna tikeleı baılanysty. Ádilettilik saltanat qurýy úshin usaq-túıek bolmaýy tıis, – degen oblystyq saılaý komıssııasynyń hatshysy Aleksandr Malashko oblystyq saılaý komıssııasynyń músheleri saılaý kúni daýys berýge kele almaıtyn jaǵdaıda óz saılaý ýchaskesine aldyn ala kelip, shyǵarý kýáligin alýǵa aryz berýi kerektigine erekshe toqtaldy. Mundaı kýálik 19 naýryz kúni keshki 18.00 saǵatqa deıin ǵana beriledi eken. Ol kýálikpen saılaý­shy tek saıası partııalar úshin ǵana daýys berýge quqyly kórinedi. Al saı­laýshylardyń densaýlyǵyna, otbasynda naýqas adamdy kútýine, alys aýdandar­dan, saılaý ýchaskesi qurylmaǵan shalǵaı aýyldardan óziniń saılaý ýchaskesine je­te almaıtyndaı jaǵdaılarda olar úshin turǵan jerinde daýys berý uıymdastyrylatyny da atap aıtyldy. Ondaı aryz daýys beretin kúni kúndizgi 12.00-ge deıin qabyldanady. Saılaý komıs­sııasynyń músheleri saılaýshylardy daýys berýde belsendilik kórsetýge shaqyrdy. Názıra JÁRIMBETOVA, «Egemen Qazaqstan». QOSTANAI.