«Kúlki jáne kóz jasy»

Tursynjan Shapaıdyń jańa kitaby jaryqqa shyqty Osydan biraz buryn tanymal qalamger Tursynjan Shapaıdyń «Kúl­ki jáne kóz jasy» kitabynyń tusaý­keseri ótti. Oǵan shahardaǵy ádebıet­tanýshylar men belgili pýblısıster, BAQ jetekshileri men qalamy júırik jýrnalıster qatysty. Bul jıynnan belgili ǵa­lymdar da tabyldy. Kópten kútken kitaptyń tusaý­keser rásimin «El» prodıý­serlik ortalyǵynyń dırektory Ǵalym Dosken men «Qazaq ádebıeti» gazetiniń bas redaktory Jumabaı Shashtaıuly jasap, jazý ónerine qatysty oılarymen bólisti. Rýhanı basqosý turǵysynda ótken kitaptyń tusaýkeserinde Tursynjan Shapaıdyń sózine jazylǵan ánder oryndalyp, ádebı keıipkerleri sóz aldy. Ramazan Stamǵazıev, Bekjan Turys, Ultý Qabaeva syndy ónerdiń bel balalary shyǵarmashylyq bas qosýdyń salmaǵyn arttyrdy. Tanymal akter Asqar Naımantaev jazý­shynyń shyǵarmasynan («Qa­zaqpen saýdalasý») úzindi oqydy. Atalmysh kitap «Aqjúnis» baspasynan shyqqan tuńǵysh kitap ekenin aıta ketý lázim. Osy­naý jobaǵa muryndyq bolǵan «Aqjúnis-Astana» jýrnalynyń bas redaktory Sáýle Ábedınova qazirge «Kúlki jáne kóz jasy» kitaby 2 myń danamen jaryq kórgenin, suranys ósken saıyn taralymy da óse beretindigin aıtady. Tursynjan Shapaıdyń er­te­rekte jaryq kórip, jurt­shy­lyqtyń yqylasyna ıe bolǵan «Qazaqtyń jany» kitabyna engen áńgime, esseleri sońǵy jyldary jazylǵan kóptegen jańa týyndylarymen tolyqtyrylyp, «Kúlki jáne kóz jasy» degen atpen shyǵyp otyr. Jańa kitap «Kúlki jáne kóz jasy», «Jazý», «Bir mysqal...», «...Jáne bir esse» degen tórt bólimnen turady. Tórt taraýdan turatyn ki­tap bólek sarynymen, erekshe oı oralymdarymen, tili­niń shuraılylyǵy, sóziniń sal­maqtylyǵy, máseleleriniń kókeı­kes­tiligimen oqyrmandaryn eleńdetip otyr. Zamana tynysy, qoǵam men adam minezindegi qu­bylystardy, qazirgi kóńil kúıdi beıneleý talaby – bul ki­tapqa engen týyndylardyń negizgi mazmunyn aıqyndaıdy. Jazýshy, ádebıet synshysy Tursynjan Shapaıdyń budan basqa, «Oı túbinde jatqan sóz», «Shyn júrek – bir júrek», «Qaz­aqtyń jany» atty kitaptary ja­ryqqa shyqqan. 2001 jyly «Shyn júrek – bir júrek» kitaby úshin qalamger Halyqaralyq «Alash» ádebı syılyǵyn alǵan. Tursynjan Shapaıdyń saz­­gerligi – óz aldyna bólek áń­gime. Onyń «Arman», «Darıǵa-dáýren», «Sáýle-ǵumyr», «Aı­daı», «Aı, sáýlem», «Oı, dúnıe», «Qara­kóz qalqa», «Oı, janym», «Qaıran, Qarasazym-aı», «Ba­la ǵashyq» ánderi Ramazan Stamǵazıevtyń, «Qońyr» toby, t.b. qazaq ánshileriniń oryndaýynda halyqqa keń taraǵan. Uly Abaıdyń «Esińde bar ma jas kúniń», «Júregim meniń qyryq jamaý», «Ǵashyqtyq qumarlyq pen ol eki jol» óleńderine jazǵan birneshe áni bar. Aınash ESALI, «Egemen Qazaqstan». ALMATY. Sýretti túsirgen Samat QUSAIYNOV.