Táýelsiz Memleketter Dostastyǵy baıqaýshylary mıssııasynyń ókilderi Ortalyq saılaý komıssııasynda brıfıng ótkizip, saılaý naýqanyna qatysty pikirlerimen bólisti.
TMD baıqaýshylar mıssııasy shtabynyń múshesi Evgenıı Kozıaktyń atap ótýinshe, mıssııa quramynda Ázerbaıjan, Armenııa, Belarýs, Qyrǵyzstan, Moldova, Reseı, Tájikstan, Túrikmenstan, О́zbekstan elderinen, TMD-ǵa qatysýshy memleketterdiń Parlamentaralyq Assambleıasynan, Belarýs pen Reseı odaǵy Parlamenttik jınalysynan, UQShU Parlamenttik Assambleıasynan jáne TMD Atqarýshy komıtetinen 301 baıqaýshy akkredıttelgen.
«San jaǵynan alǵanda, bul halyqaralyq baıqaýshylardyń eń úlken mıssııasy bolyp otyr. Olardyń basym bóligi saılaý kúnine deıin Qazaqstanǵa keledi. Saılaýdy baıqaý aıasynda mıssııa músheleri Bas prokýratýrada, Joǵarǵy Sotta jáne Ishki ister mınıstrliginde bolyp, kezdesýler ótkizdi. Bas prokýrormen kezdesý barysynda mıssııa ókilderine saılaý naýqany kezeńinde zańnamanyń saqtalýyn qadalaǵaý boıynsha atqarylǵan jumystar sóz boldy. Joǵarǵy Sot basshylyǵy saılaý úderisindegi sottardyń róli jaıynda aıtyp berdi. Al Ishki ister mınıstrimen ótken kezdesýde saılaý ótkizý barysynda qaýipsizdikti qamtamasyz etý úshin qabyldanǵan sharalar jaıynda áńgime boldy», – dedi Evgenıı Kozıak.
Álısultan QULANBAI,
«Egemen Qazaqstan».