QOSTANAI. 19 naýryz. «Varvarınskoe» aksıonerlik qoǵamy men Qostanaı oblystyq ákimdigi arasynda áleýmettik jobalardy júzege asyrý jónindegi yntymaqtastyq memorandýmyna qol qoıyldy. Bul týraly oblys ákimi baspasóz qyzmetine silteme jasaǵan egemen.kz tilshisi habarlady.
Memorandýmǵa «Varvarınskoe» óndiris kásipornynyń bas dırektory Sımon Aleksandr men oblys ákimi Arhımed Muhambetov qol qoıdy. Memorandým sheńberinde júzege asatyn áleýmettik jobalar úshin «Varvarınskoe» oblysqa 136,5 mıllıon teńge aýdaratyn boldy. Balalar fýtbol komandasyn damytýǵa osy qarjynyń 123 mıllıon teńgesi jumsalmaq, 5 mıllıon teńgesine Lısakov qalasyndaǵy tehnıkalyq kolledjdiń materıaldyq-tehnıkalyq bazasyn jańǵyrtý jumystary júrgiziledi. Qalǵanyna basqa da áleýmettik jobalar júzege asyrylmaq.
Oblys ákimi Arhımed Muhambetov «Varvarınskoe» óndirisin damytý máselelerine toqtaldy. Oblys ákimi Arhımed Muhambetov: «Kompanııa basshylyǵy kendi óńdeýdiń aımaqtyq jelisin qurý jumystaryn júrgizip otyr. Aqtóbe, Shyǵys Qazaqstan oblystary kásiporyndarymen, bizdiń oblystaǵy «Orıon mınerals» jaýapershiligi shekteýli seriktestigimen kendi aldaǵy ýaqytta óńdeý úshin alys-beris jasaýǵa kelissóz júrgizilip jatyr. О́ndiris ónimin osylaı arttyryp, onyń baǵasyn ósirý bizdiń oblystyń da áleýmettik-ekonomıkalyq jaǵdaıyna oń yqpal jasaıtyn bolady», – dedi. Sonymen qatar aımaq basshysy qazirgideı kúrdeli ýaqytta óndiris kásipornynyń yrǵaqty jumys isteýi úshin máselelerdiń sheshimin tabýyna qoldaý kórsetetin de aıtty.
Eske sala ketsek, altyn óndiretin «Varvarınskoe» ken kásiporny oblystyń ekonomıkalyq-áleýmettik damýyna osy ýaqytqa deıin 564,9 mıllıon teńge ınvestısııa saldy. Sonyń arqasynda Tobyl poselkesindegi ambýlatorııaǵa medısınalyq jabdyqtar alyndy, Qostanaı qalasyndaǵy sport alańdary, Lısakov qalasyndaǵy boks rıngi salyndy.
«Varvarınskoe» aksıonerlik qoǵamynyń bas dırektory Aleksandr Sımon: «Bizdiń kásiporynda eńbek etetin adamdar jaqyn poselkeler men qalalar turady. Sondyqtan sol qala men posekelerge salǵan qarjyny biz óz jumysshylarymyzǵa jasaǵan áleýmettik qamqorlyǵymyz dep bilemiz», – dedi.
2009-2014 jyldar arasynda bul óndiris kásiporny bıýdjet pen bıýdjetten tys qorlarǵa 40,7 mlrd. teńge salǵan. 2015 jyl qorytyndysy boıynsha tólemderi 2,7 mlrd. teńgege artqan.
Názıra Járimbetova.
Derek, sýret: egemen.kz.