Almatyda barlyǵy 532 baıqaýshy saılaý naýqanynyń laıyqty ótýi úshin atsalysty. Jaýapty naýqanǵa birneshe semınar-trenıngten dáris alyp, Qazaqstan Respýblıkasynyń Konstıtýsııasyn, «Saılaý týraly» Zańdy qaıtalaı jadyna salyp, baıqaýshynyń mindeti men qyzmetin tııanaqtaǵan bul toptyń Almatydaǵy jetekshisi, Saılaýdy baıqaý jónindegi respýblıkalyq qoǵamdyq komıssııa tóraǵasynyń orynbasary, Prezıdent janyndaǵy quqyqtyq saıasat keńesiniń múshesi, professor О́miráli JALAIRIDI áńgimege tarttyq.
– О́miráli Shakarapuly, talaı saılaýdy bastan ótkergen bilikti zańger retinde aıtyńyzshy, bul saılaýdyń ereksheligi nede?
– Erekshelik dep aıtýǵa bolmaıtyn da shyǵar. Barlyq saılaý naýqanynyń baǵyty men qyzmeti bir. Búgingi saılaýdyń bir ǵana artyqshylyǵy – Parlament Májilisi men jergilikti máslıhattarǵa depýtattar saılaý qatar júrgizilip jatqandyǵynda ǵana.
– Baıqaýshylar daıyndyǵyna kóńilińiz tolady ǵoı?
– Árıne tolady. Baıqaýshylarǵa bizdiń akademııanyń tanymal professorlary men oqytýshylar quramy sabaq berdi. Meniń óz basym byltyrǵy Prezıdent saılaýynda da aýmaqtyq osy komıssııanyń tóraǵasy bolǵanmyn. Saılaýǵa baıqaýshylardy qamtamasyz etýden tájirıbemiz barshylyq. Sol tájirıbemen bólistim.
– Elimizde ótetin árbir saılaý naýqanynyń alǵy shebinde júretin «Zańgerler ádil saılaý úshin!» respýblıkalyq qoǵamnyń qyzmeti týraly ne aıtar edińiz?
– Iá, durys baıqaǵansyz, Almatyda 2005 jyly qurylǵan «Zańgerler ádil qoǵam úshin!» qoǵamyna da men tóraǵalyq etemin. Bul qoǵam búgin respýblıkalyq komıssııamen úzeńgi qaǵystyryp qatar keledi, qatar turyp qaýyrt jumys istep jatyr.
– Baıqaýshylar jumysyna azamat, zańger retinde ózińizdiń kóńilińiz tola ma?
– Árıne, tolady. Naýqanǵa Almatydaǵy barlyq joǵary oqý oryndary atsalysty. Barlyǵy da bilikti zańgerler, tehnıkalyq-gýmanıtarlyq salanyń bilgir mamandary. Mádenıet te, tártip te, tájirıbe de bar.
– Áńgimeńizge rahmet.
Áńgimelesken
Talǵat SÚIINBAI,
«Egemen Qazaqstan». ALMATY.