Jastar jaýapkershiligi joǵary eken

Elimizdegi Parlament Májilisiniń depýtattaryn saılaý barysyn qadaǵalaýǵa shekara asyp 800-den astam halyqaralyq sarapshy jáne 150-ge jýyq sheteldik BAQ ókilderi kelgen bolatyn. Qazaqstandaǵy saılaý úderisin qadaǵalaý jumystary boıynsha arnaıy kelgen sheteldik sarapshy, senator jáne NATO PA-daǵy Italııa delegasııasynyń múshesi Franko PANISSADAN birer saýalǵa jaýap alǵan edik. – Franko myrza, bizdiń elge qosh kelipsiz deı otyryp, búgingi saılaý barysyna baılanysty ózińizdiń sarapshy retindegi pikirińizdi bilsek deımiz? – Men Qazaqstanǵa kel­genime qýanyp otyrmyn. Ra­synda, Italııa men Qa­zaqstan arasynda dostyq qarym-qatynas ornatylǵan. Biz jas memleket retindegi Qazaqstannyń álemdik saıa­sattaǵy ornynyń ýaqyt sanap artyp kele jatqandyǵyn moıyndaımyz. Al saılaý barysyna keler bolsaq, daýys berýge kelýshilerdiń sanynyń kóptigi birinshi kezekte nazaryma ilikti, ıaǵnı azamattardyń belsendiligi tańǵaldyrdy. So­nymen qatar, aıta ketý kerek, óz bolashaǵyna alańdaıtyn jastardyń saılaýǵa kóptep kelýi qýantty. Desek te, el taǵdyryna tol­ǵanatyn egde jastaǵy aza­mat­tardyń da qatary qalyń boldy. Oǵan sebep, jastarmen birdeı úlkender de saılaý ýchaskelerine tań atpaı kelip, daýys berýdiń jaýapkershi­ligin sezinetindigin ańǵartty. Jáne de múmkindigi shekteýli jandarǵa arnaıy jaǵymdy da qolaıly jaǵdaılar ja­salǵandyǵy kóńil qýantty. Aıta keteıik, el depýtattaryn saılaý úshin sheteldegi qazaqstandyqtarǵa da sol elderden ýchaskeler ashylyp, daýys berýge múmkindikter qarastyrylǵan. – О́zge memleketterdegi saılaý barysyn baqylaı otyryp, ómirlik tájirı­beńizde bizdiń eldegi nendeı erekshelikterdi atap aıtar edińiz? – Joǵaryda aıtyp ót­ke­nimdeı, jurtshylyqtyń jappaı belsendiligin birinshi aıtar edim. Jáne de daıyndyq jaǵ­daıy, uıymdastyrýshylyq jumystary, tehnıkalyq ja­raqtar saqadaı saı, azamattar óz isine jaýapty bolǵanyn baıqadym. Sonymen qatar, saılaý kezinde eshqandaı olqylyqtardy kezdestirgenim joq, ıaǵnı zań normalary saq­­talǵan, barlyq talaptar­ǵa saı ótýde. Bir qyzyǵy – saı­­laý kúni týǵan náres­te­lerge ádemi syılyqtar ta­ǵaıyndalǵany tańǵaldyrdy. Bul degenińiz – jurtshylyqtyń qyzyǵýshylyǵy men qurmetin arttyrý degendi bildiredi. Bir ǵana saılaý ýchaskesinde túske deıin-aq 700-ge jýyq adam daýys berip úlgergenin kórdik. Bul da aýyz toltyryp aıtarlyqtaı úlken kórsetkish, joǵary baǵaǵa laıyq jaǵdaı. Menimen birge kelgen ıtalııalyq mamandar da jastardyń jappaı belsendiligin aıtyp jatyr. Meniń de baıqaǵanym osy jaǵdaılar boldy. Aldaǵy ýaqytta Qazaqstan memleketine mol tabystar tileımin! – Rahmet. Áńgimelesken Elmıra MÁTIBAEVA, «Egemen Qazaqstan».