Úgit jumystary zańǵa sáıkes júrgizildi

Úgitti qosa alǵanda, daýys beriletin kúnniń aldyndaǵy barlyq is-sharalar «Qazaqstan Respýblıkasyndaǵy saılaý týraly» Konstıtýsııalyq zańǵa sáıkes júrgizildi. Memlekettik organdar tarapynan qandaı da bir zań buzý­shylyqtar tirkelgen joq. Bul týraly keshe Pre­zıdent janyndaǵy Ortalyq kommýnıkasııalar qyzmetinde ótken baspasóz máslıhatynda Bas prokýratýranyń  resmı ókili Nurdáýlet Súıindikov málim etti. «Konstıtýsııaǵa jáne Mem­leket basshysynyń tapsyrmasyna saı, Bas prokýratýra aǵym­daǵy saılaý prosesiniń zań­dylyǵyn qamtamasyz etý boıynsha barlyq qajetti shara­lardy qabyldady. Elekto­rat­­tyq kezeńde azamattardyń kons­tı­týsııalyq quqyqtarynyń já­ne saılaý zańnamasynyń saqta­lý máseleleri prokýror­lar úshin jumystyń negiz­gi ba­sym­dylyǵy bolyp bel­gi­lendi», dedi Bas prokýratýranyń resmı ókili. Tek saılaý aldyndaǵy úgitti júrgizý sharttarynyń jekelegen buzýshylyqtary oryn alǵan. Naqty aıtqanda, Shyǵys Qazaqstan oblysynyń Zyrıan aýdanynda prokýratýra ýchaskelik saılaý komıssııasynyń tóraǵasy A.Ý.Júnisovaǵa qatysty máslı­hat depýtattyǵyna kandı­dat­tardyń birin qoldaýmen saılaý aldyndaǵy úgit júrgizgeni úshin ákimshilik is qozǵaǵan. Júnisova komıssııa tóraǵasynyń min­detterin atqarýdan bosatylyp, sondaı-aq, ony sot 30 AEK mól­sherindegi aıyppul túrinde ákim­shilik jaýapkershilikke tartqan. Sonymen qatar, Shymkent qalasynyń Qarataý aýdanyn­da qalalyq máslıhattyń depýtat­tyǵyna kandıdattyń úgitteý materıaldaryn búldirgeni úshin qala turǵyny J.K.Býbeev ákimshilik jaýapkershilikke tartylypty. Sondaı-aq, saılaý aldyndaǵy úgitti júrgizý erejelerin buzý faktileri boıynsha prokýratýra elordanyń úsh turǵynyna zańdy buzýǵa jol berilmeıtini týraly aldyn ala eskertý jarııalaǵan. «Prokýratýra organdary saılaý zańnamasynyń bu­zylý faktileri boıynsha ózge qadaǵalaý aktilerin engizgen joq. Daýys beriletin kúnniń aldyndaǵy kezeńde Parlament Májilisine saılaý boıynsha prokýratýra organdaryna úsh ótinish qana kelip tústi. Mysaly, Valentına Bezrýkova Parlament Májilisiniń depýtattyǵyna ózin ózi usynǵan kandıdat retinde tirkeýden bas tartqan saılaý komıssııalaryna shaǵymdanǵan. Oǵan kandıdattardy usyný saıası partııalarmen ǵana júze­ge asyrylatyndyǵy túsin­di­rildi. Jalpy, saılaý zańnama­synyń qandaı da bir eleýli buzý­shylyqtarynyń bolmaýy, bizdiń pikirimizshe, aǵymdaǵy saılaý prosesiniń barynsha ashyq jáne zańdy ekendigin kýálandyrady», dedi N.Súıindikov. Ol, sondaı-aq, saılaý kúni, ıaǵ­nı keshegi kúnge qatysty da aqparattarmen bólisti. «Qazaq­stan Respýblıkasyndaǵy saılaý týraly» Konstıtýsııalyq zańǵa sáıkes, saılaý kúni prokýratýra organdary úshin jumys kúni bolyp tabylady jáne sol kúni túsken ótinishter dereý sheshiletin bolady. Ortalyq deń­geıde de, jergilikti jerlerde de saılaý komıssııalarymen jáne múddeli memlekettik organdarmen bizdiń úzdiksiz baı­lanysymyz ornatylǵan. Saı­laý ýchaskelerinde qoǵamdyq qaýip­sizdikti polısııa organdary qamta­masyz etti. Elektorattyq naý­qan sııaqty saılaý kúni de baısaldy jaǵdaıda ótti. Aza­mat­tardyń saılaý quqyqtarynyń buzylýy nemese ózge eleýli quqyqqa qaıshy is-áreketter tir­kelgen joq», dep málimdedi Bas prokýratýranyń resmı ókili. Keshegi kúngi saǵat 16.00-degi jaǵdaı boıynsha prokýratýra organdaryna 8 ótinish tús­ken. Máselen, Astanada proký­ra­týraǵa partııalardyń biriniń ókili Rahymjanovtan jáshik­terdiń baıqalýyna jaǵ­daı jasaýdy qamtamasyz etpe­geni úshin №78 ýchaskeniń saılaý komıs­sııasynyń tóraǵa­sy­na shara qoldaný týraly eki uqsas ótinish túsken. Ońtús­tik Qazaqstan oblysynda So­zaq aýdanynyń prokýratýra­syna G.Jaqaıqyzy (aýdandyq más­lıhatqa kandıdat Ý.Shúkeeva­nyń senim bildirilgen adamy) kan­dı­dattardyń biriniń jaqtas­tary daýys berý úshin kelgen adamdardyń foto/beınetúsirilimin júrgizgendigine shaǵymdanǵan. Atalǵan ótinishter quzyreti boıynsha saılaý komıssııalaryna joldanǵan. N.Súıindikovtiń aıtýynsha, Shyǵys Qazaqstan obly­sy Aıagóz aýdanynyń prokýra­tý­rasyna aýdandyq máslıhat­qa kandıdattardyń biriniń senim bildirilgen adamy A.Sú­leı­menova basqa kandıdattyń senim bildirilgen adamy onyń ar-namysy men qadir-qasıetin qorlaǵany týraly aryzben júgingen. О́tinish qaraý úshin polısııaǵa joldanǵan. Osy oblysta A.A.Kýznesov emdeý mekemeleriniń biriniń pasıent­terin saılaýshylar tizimine engizi­lýiniń negizdiligine qatys­ty prokýratýraǵa aryzben júgingen. Atalǵan ótinishti aryzdanýshy dereý qaıtaryp alǵan, osyǵan baılanysty qaraýsyz qaldy­rylypty. Qalǵan ótinish­ter boıynsha olarda kórsetilgen buzýshylyqtardyń belgileri týraly aqparattar tekserilýde. Dınara BITIKOVA, «Egemen Qazaqstan».