Keshe Ulttyq akademııalyq kitaphanada saılaýdyń qalaı ótkeni jóninde baspasóz máslıhaty ótti. Oǵan qoǵamdyq uıymdardyń ókilderi men otandyq jáne sheteldiń birqatar jýrnalısteri, sondaı-aq, saılaýdy baqylaǵan halyqaralyq uıymdardyń baıqaýshylary qatysty.
Sharany uıymdastyrǵan Qazaqstan Respýblıkasynda Saılaýdy baıqaý jónindegi respýblıkalyq qoǵamdyq komıssııanyń tóraǵasy men orynbasarlary naýqandaǵy óz jumystary týraly áńgimeledi. Máselen, saılaýdyń barlyq úderisin búge-shigesine deıin muqııat qadaǵalaý úshin 10 myńnan asa baıqaýshy daıyndaǵandaryn aıtqan qoǵamdyq komıssııa tóraǵasy Nurlan Erimbetov, qyzmetke jegilgen saılaý ýchaskelerindegi ókilderiniń ashyq jumys isteýleri úshin barlyq jaǵdaı jasalǵanyn tilge tıek etti.
«Saılaýdy baıqaýǵa daıyndalǵan 10 myńnan asa baıqaýshylarymyzdyń bári birdeı óz mindetin jaqsy biletin azamattar. Olardyń basym kópshiliginiń buǵan deıin de mundaı aýqymdy sharalarǵa qatysyp, mol tájirıbe jınaqtaǵanyn aıtyp ótkenimiz jón. Munymen birge, bir aı boıy bul jolǵy saılaýdyń buǵan deıingi naýqandardan erekshelikterin baıqaýshynyń árbirine muqııat túsindirý jumystary tııanaqty júrgizildi. Olardyń qalaı júrip-turyp, saılaýshylar arasynda ózderin qalaı ustaýy kerektigine deıin tereń uqtyryldy», dedi ol.
Komıssııa tóraǵasy jergilikti turǵyndarmen, ıaǵnı elektoratpen de tıisti jumystar atqarylǵanyn nazardan tys qaldyrmady. «Qoǵammen de tyǵyz baılanysta bolyp, olardyń quqyǵy men saılaý tártibi jóninde túsindirý jumystary júrgizildi. Májilispen qatar, máslıhattar depýtattaryn da saılaý kerek bolǵandyqtan, keıbir usaq-túıek túsinispeýshilikter bolǵan bolýy yqtımal. Biraq, jalpy alǵanda, saılaý nátıjeli ótti deýge aýyz barady», dedi N.Erimbetov.
Shara barysynyń ekinshi bóliginde komıssııa tóraǵasyna túrli suraqtar qoıyldy. Bul jóninde sheteldik buqaralyq aqparat quraldarynyń ókilderi belsendilik tanytty. Latvııanyń jýrnalısi azamattardyń túgel derlik qatysqanyna qalaı kóz jetkizýge bolatyny jóninde surady. «Bizde mundaı másele Almaty qalasynda ǵana oryn alýy múmkin. Sebebi, qala úlken bolǵandyqtan, ol jerge jańadan kóship kelip, áli tirkelýge úlgire almaı júrgen adamdar bar. Sondaı-aq, úlken qalaǵa jumys izdep kelip, onda ýaqytsha turyp jatqandar da kezdesedi. Mundaı jaǵdaıda, osy turǵyda kemshilikter oryn alýy kádik. Soǵan qaramastan, halyqtyń basym kópshiligi saılaýǵa qatysqany bizdi shyn qýantyp otyr», dedi komıssııa tóraǵasy.
Polsha jýrnalısi halyqaralyq baıqaýshylar tarapynan bir kabınaǵa bir otbasy birge kirip-shyqqanyn baıqap qalǵandary bar ekenin alǵa tartyp, onyń qanshalyqty zańdy ekenin surady. «Mundaı zańsyzdyqty, ókinishke qaraı bizdiń baıqaýshylar baıqamaı qalǵan bolýy kerek. Biraq biz bul máselemen mindetti túrde shuǵyldanamyz. Sóıtip, tıisti adamdarǵa eskertiletin bolady. Esterińizde bolsa, keńestik zamanda bir otbasynyń barlyq tólqujatyn bir ǵana adam ákelip, báriniń atynan daýys bere salatyn edi. Halyq bolǵan soń sol mentalıtetten alystaı qoımaǵandary da bolýy yqtımal. Biraq qazir zaman basqa, zań basqa. Ár saılaý ýchaskesinde óz elimizdiń kemi 6-7 baıqaýshysy bolsa, halyqaralyq uıymdardyń ókilderi taǵy bar. Muny halyq jaqsy bilip otyr. Sondyqtan olar eshkimge qaramaı-aq tańdaý jasaýǵa bolatynyn kórip tur», degen N.Erimbetov brıfıng qatysýshylaryn Ulystyń uly kúni – Naýryz merekesimen quttyqtady.
Nurbaı ELMURATOV,
«Egemen Qazaqstan».