Belsendilikti báseńsitkenimiz joq

О́tken jeksenbi kúni ótkizilgen Par­lament Májilisi depýtattary saılaýyn­da Saılaýdy baı­qaý jónindegi res­pýb­lı­kalyq qo­ǵamdyq komıssııa aı­ta qalarlyqtaı tyn­dyrymdy isterge uıytqy bola bildi. Al oblystarda osy komıssııanyń óńir­lik ortalyqtarynyń shtabtary quryldy. Biz keshe Batys Qazaq­stan oblysyndaǵy osyndaı qurylymnyń múshesi Svetlana Seıilhanovaǵa jolyǵyp, birer saýal qoıǵan edik. Svetlana Serik­qyzy, Oral óńirinde ótkizilgen Parlament Májilis depýtattaryn saılaýdyń ótý barysy kezinde is-qımyl tanytqan qoǵamdyq shtabtyń múshesi retinde ne aıtar edińiz? – Birden aıtaıyn respýb­lı­ka­lyq qoǵamdyq ko­mıs­sııanyń Batys Qazaqstan oblysyndaǵy óńirlik ortasynyń músheleri tek saılaý kúni ǵana emes, sonymen birge, oǵan ázirlik kezeńi barysynda da aýqymdy ister atqardy. Máselen, bizdiń oblysta 520 saılaý ýchaskesi qurylǵan bolsa, sonyń árqaısysyna bir qoǵamdyq baıqaýshydan bekitildi. Bul artyq-kemi joq 520 qoǵamdyq negizdegi baıqaýshy saılaýǵa deıingi jáne saılaý kúngi úderisterdiń bárine qatysty degen sóz. Olardyń quramy men áleýmettik tegin negizinen stýdentter men zeınet jasyndaǵy adamdar, azamattyq jáne úkimettik emes uıymdardyń ókilderi qurady. Sondyqtan da biz úshin birinshi kezekte olardy saılaýdy ótkizý zańdylyqtarymen tanystyrý, osy baǵytta arnaıy semınarlar men trenıngter uıymdastyrý mindeti turdy. Bul jaýapty is-shara óńirde oıdaǵydaı atqaryldy degen oıdamyn. Sonymen birge, árbir qoǵamdyq baıqaýshy ózderine bekitilgen saılaý qosyndarynda saılaýshylarmen tyǵyz qarym-qatynas ornata bildi. Tizimderdi naqtylaýǵa kómek berdi. Ýchas­kelerdiń tı­isti talaptarǵa sáı­kes jabdyqtalýyn qadaǵalady. Saılaýǵa ázirlik barysynda biz olardyń aıtqan syn-eskertpeleri boıynsha tıisti sheshim qabyldap otyrdyq. Sondaı-aq, oryn alǵan keıbir kemshilikter der ýaqytynda túze­tildi. – Al 520 ýchaskege bekitilgen qoǵamdyq baıqaýshylardyń dál saılaý kúngi is-qımyly týraly ne deý­ge bolady? – О́tken jeksenbi, ıaǵnı 20 naý­ryz kúni tańerteń saǵat 7-de olardyń bári de óz oryndarynan tabyldy. Alǵashqy daýys berý rásimine kýá boldy. Daýys berý bıýlletenderin sanaǵan kezde de qoǵamdyq baı­qaýshylar qyraǵylyq tanyta bildi. Árıne óńirdegi 520 ýchaskeniń bárine birdeı barýǵa bizdiń aıaǵymyz jete alǵan joq. Degenmen, ondaǵy saılaýdyń ótý barysyn óz ókil­derimiz arqyly qadaǵalap otyr­dyq. Ár ýchaskedegi saılaýǵa ázirlik pen onyń ótkizilý barysyn baıqaýshylar udaıy nazarda ustady. Al biz olardyń is-qımyldaryn kózden tasa qylmaýǵa umtyldyq. – Saılaýdyń ótkizilýi kezinde olardyń tarapynan qandaı da bir syn-eskertpeler boldy ma? – Árıne, ishinara keıbir usaq-túıek, eleýsizdeý kemshilikter kezdeskenimen, tutastaı alǵanda saılaýdyń tártibi buzylǵany jóninde eshqandaı derek oryn alǵan joq. Daýys berý kezinde saılaýshylardyń belsendilik tanytqanyn qoǵamdyq baıqaý­shylar rızashylyqpen aıtyp otyr. – Áńgimeńizge rahmet. Jazyp alǵan Temir QUSAIYN, «Egemen Qazaqstan». Sýrette: qoǵamdyq shtabtyń múshesi Svetlana Seıilhanova. Sýretti túsirgen Rafhat HALELOV.