Sonymen, saılaý atty saıası alaman aıaqtaldy. Parlamenttiń tómengi palatasyndaǵy oryndar úshin bolǵan partııalar arasyndaǵy báseke márege jetip, daýys berýdiń alǵashqy nátıjeleri jalpaq jurtqa jarııalanyp úlgergeni belgili.
Elimizdiń ómirindegi osynaý eleýli oqıǵaǵa baılanysty keshe «Birlik» saıası partııasynyń tóraǵasy Serik Sultanǵalı buqaralyq aqparat quraldary aldynda málimdeme jasady. О́ziniń ózekjardy sózin Prezıdent Nursultan Nazarbaevty jáne Elbasynyń saıası tiregi – «Nur Otan» partııasyn aıqyn jeńisimen quttyqtaýdan bastaǵan ol Májiliske óz ókilderin usynýǵa múmkindik beretin mejeni baǵyndyrǵan basqa da áriptesteriniń respýblıkamyzdyń joǵary zań shyǵarýshy organyndaǵy aldaǵy qyzmetterine tabys tiledi.
Salmaqty oı sabaqtaǵan saıasatkerdiń pikirinshe, bul saılaý Prezıdentimizdiń ustanǵan sara baǵytyn, Ult Jospary men basqa da mańyzdy memlekettik baǵdarlamalardy halqymyz barynsha qoldaıtynyn kórsetken. Eń bastysy, saılaý Qazaqstan Respýblıkasy Konstıtýsııasynyń, halyqaralyq standarttar men elimizdegi tıisti zańnamalar talabyna saı, joǵary dárejede ótken. Ortalyq saılaý komıssııasy saıası dodaǵa túsken barlyq partııalarǵa teń jaǵdaı jasaǵany aıryqsha ekpinmen aıtyldy.
Al bul joly aıy ońynan týa qoımaǵan «Birlik» partııasy keleshekte óz qataryn kóbeıtip, belsendi jumysyn jalǵastyra bermek. Saılaýaldy úgit-nasıhat naýqanynda qalyń kópshiliktiń barlyq áleýmettik toptarymen kezdesken birliktikter olarǵa ne kerek ekendigine kóz jetkizip qana qoımaı, alda atqarar aýqymdy mindetterin aıqyndaǵan. Endigi ýaqytta olar osy qarqyndy joǵaltpaı, jergilikti fılıaldar men ókildikteriniń qyzmetin jańasha serpinmen jalǵastyrmaq.
«О́tken saılaý «Birlik» saıası partııasy úshin úlken beles boldy. О́ıtkeni, biz mol tájirıbe jınaqtadyq. Sonyń bárin bolashaqta tıimdi paıdalanbaqpyz», dep sózin túıindedi Serik Sultanǵalı.
Jýrnalısterdiń qoıǵan suraqtaryna qysqasha jaýap qaıtarǵan «Birlik» partııasynyń basshysy jınalǵandardy Ulystyń uly kúni – Naýryz meıramymen quttyqtap, júrekjardy jyly lebizin jetkizdi.
Talǵat BATYRHAN,
«Egemen Qazaqstan».