Qazaqstan Respýblıkasynda saılaýdy baıqaý jónindegi respýblıkalyq qoǵamdyq komıssııa keshe Ortalyq kommýnıkasııalar qyzmetinde baspasóz máslıhatyn ótkizdi. Onda qoǵamdyq komıssııa tóraǵasy Nurlan Erimbetov saılaý naýqanynyń aıaqtalýyna baılanysty, sondaı-aq, saılaý kezinde baıqaýshylardyń atqarǵan jumysy jóninde aıtty.
Saılaýdyń qadaǵalaý jumysy tııanaqty júrgizilgenine toqtalǵan komıssııa tóraǵasy, naýqan barysynda óreskel zań buzýshylyqtar oryn almaǵanyn kóldeneń tartty. «Baıqaýshylardyń saılaý úderisin erkin baqylaýyna yryq berildi. Olar, tipti, kúdik-kúmán keltiretin keleńsizdikterdi sýretke nemese vıdeoǵa túsirip alýyna da jol ashyldy. Sondyqtan, bılik tarapynan, bolmasa qandaı da partııa tarapynan birde-bir qysym nemese basqalaı áreket jasalǵan joq. Bizdiń baıqaýshylarymyzben qatar, partııalar men túrli uıymdardyń ókilderi de úderisti tolyq kózden keshirip turdy deýge bolady. Sonyń nátıjesi bolar, saılaý yń-shyńsyz, birqalypty ótti», dedi saıasatker.
– Bizdiń shtab saılaý aldyndaǵy bir aıda tynymsyz jumys istedi. Saılaý kúni táýlik boıy damylsyz qyzmet ettik. Barlyq baıqaýshylarymyzben únemi úzilissiz baılanysta boldyq. Bárinen alynǵan málimetterge qaraǵanda, saılaý jaqsy ótti. Negizi saılaýǵa deıingi bir aıda bizdiń shtabqa 4 hat kelip tústi. Onda deklarasııany durys toltyrmady, ýaqtyly tirkemedi degen sııaqty máseleler týyndaǵan. Biz olardyń der kezinde sheshilýine atsalystyq. Osy orynda aıtarym, komıssııanyń basty mindeti baıqaýshylardy saýatty daıyndaý bolatyn. Bul jumysymyz tııanaqty júrgizilgendikten, óz jemisin berdi ǵoı dep oılaımyn. Sebebi, bilimdi jastardyń osy saıası úderiske degen yntasy zor boldy. Olar saılaýdy syrttaı baqylap qana qoımaı, ishine kirip qyzmet etýge ynta tanytty. Bul is olarǵa tájirıbe jınaqtaýǵa jáne aldaǵy qyzmet baspaldaǵyna demeý bolatyn kórinedi. Sondyqtan, saılaýǵa baıqaýshy bolǵysy kelgenderdiń qarasy kóp edi. Nátıjesinde, bizge jaqsy tańdaý jasap, bilimdi ári bilikti jastardy iriktep alýymyzǵa múmkindik týdy, – dedi komıssııa tóraǵasy.
Saılaý qarsańynda atalǵan qoǵamdyq komıssııa saılaýǵa qatysty býkletter men vıdeorolıkter jasap, elektoratqa saılaý quqyǵyn túsindirý jumystaryn júrgizipti. Sondaı-aq, partııalardyń basshylarymen kezdesip, týyndaǵan kez kelgen máseleni sheshýge qolushyn soza alatyndaryn aıtypty. «Men ózim barlyq partııalardyń lıderlerimen kezdesip, ashyq áńgime qurdym. El ishindegi usaq-túıek túsinispeýshilikter men áttegenaılardy halyqaralyq uıymdardyń baıqaýshylarynsyz-aq ózimiz sheshe alatynymyzdy uqtyrdym. Sóıtip, olardyń aryz-shaǵymyn tıisti oryndarǵa jetkizip, odan jaqsy qorytyndy shyǵarýǵa yqpal ete alatynymyzdy ashyq aıttym», dedi N.Erimbetov.
Shara barysynda komıssııa tóraǵasy jumysyn tııanaqty atqarǵan baıqaýshylarǵa óz alǵysyn aıtýdy da umytpady. «Bul múmkindikti paıdalana otyryp, áriptesterime alǵysymdy aıtamyn. Saılaý ótti, endi saıası baǵany elimiz, qoǵam beretin bolady. Degenmen de, biz ózimizdiń jumysymyzdy abyroımen atqardyq. Biz úshin bul mańyzdy», degen N.Erimbetov, búginde eldiń patrıottary bolyp sanalatyn adamdardyń qatary qalyptasyp bolǵanyn jáne olar óz isterine óte adal ekenin atap ótti. Sonyń nátıjesinde, saılaý jaqsy uıymdastyrylyp, joǵary deńgeıde ótkenin kóldeneń tartty.
Nurbaı ELMURATOV,
«Egemen Qazaqstan».