QARAǴANDY. 23 naýryz. Reseı azamattary ózderin qar qursaýynan qutqaryp qalǵan Qaraǵandy oblystyq tótenshe jaǵdaılar jónindegi departamentine alǵys hat joldady. Bul týraly oblystyq tótenshe jaǵdaılar departamentiniń baspasóz qyzmetine silteme jasaǵan egemen.kz tilshisi habarlady.
Reseı azamattary A. Demkın men A. Terentev Chelıabınsk oblysynan Shymkent qalasyna arnalǵan órt sóndirý kóligin aıdap kele jatqandarynda Ulytaý aýdanynan 30 shaqyrym jerde turyp qalǵan. Tehnıkalary synyp, ózderi boranda qalǵan reseılikter 112 shuǵyl telefony boıynsha qońyraý shalyp, kómek suraıdy. Habarlama boıynsha oqıǵa ornyna jedel jetken Ulytaý aýdandyq tótenshe jaǵdaılar bóliminiń qyzmetkerleri olarǵa jan-jaqty kómek kórsetken.
Osy oqıǵadan keıin A. Terentev pen A. Demkın Qaraǵandy oblystyq tótenshe jaǵdaılar departamenti basshysynyń mindetin atqarýshy polkovnık M. Qatpanovtyń atyna alǵys hat joldaǵan. Hatta N. Sabaǵanov, B. Mýhanbetov, D. Mýhanbetov, T. Tleýkabylov, M. Koleı jáne M. Ismaılov syndy qutqarýshylardyń esimderi qurmetpen atalypty.
Qaırat Ábildınov.
Derek, sýret: Qaraǵandy oblysy tótenshe jaǵdaılar departamentiniń baspasóz qyzmeti.