Keshe Parlament Senatynyń Tóraǵasy Qasym-Jomart Toqaevtyń tóraǵalyǵymen palatanyń kezekti jalpy otyrysy bolyp ótti. Onda kún tártibindegi toǵyz jáne senator T.Abaıdildınniń usynysymen taǵy bir másele qosylyp, barlyǵy on másele qaraldy.
Jalpy otyrysty Qasym-Jomart Toqaev qysqasha kirispe sózben ashty. Saılaýshylardyń joǵary azamattyq belsendiligimen ótken Májilis depýtattarynyń saılaýynda «Nur Otan» partııasy halyqtyń basym kópshiliginiń senimine ıe boldy. Bul halqymyzdyń Elbasy Nursultan Ábishuly Nazarbaevqa degen sheksiz senimi men júrgizip otyrǵan reformalaryna kórsetilgen qoldaý ekeni sózsiz. Saılaý kópultty Qazaqstan halqynyń tatýlyǵyn, kemeldiligin búkil álemge pash etti. Endi Senat depýtattary Májilistegi jańadan saılanǵan áriptesterimen tize qosyp, Elbasynyń strategııasyn zańnamalyq jaǵynan qamtamasyz etýde nátıjeli jumys isteıdi dep senemin, dedi Tóraǵa.
Odan ári Q.Toqaev búgingi otyrys besinshi shaqyrylǵan Parlamenttiń besinshi sessııasynyń qorytyndy otyrysy ekenin aıtty. Parlamenttiń besinshi shaqyrylymynyń depýtattary Prezıdenttiń strategııalyq reformalaryn zańnamalyq jaǵynan qajetti deńgeıde qamtamasyz etýge ózderiniń laıyqty úlesterin qosty. Osy ýaqyt ishinde 500-den astam zań qabyldandy.
Shaqyrylymnyń óne boıynda elimizdiń qoǵamdyq-saıası ómirinde aıryqsha oryn alatyn oqıǵalar boldy. Elbasynyń tikeleı bastamasymen Eýrazııalyq ekonomıkalyq odaq óz jumysyn bastady, elimiz Dúnıejúzilik saýda uıymyna múshe boldy. Álemdik ekonomıkaǵa yqpaldasý jaǵdaıynda ulttyq zańnamany jetildirý boıynsha keshendi jumystar júrgizilýde. Sonymen qatar, «Nurly Jol» baǵdarlamasyn iske asyrýǵa qajetti quqyqtyq aktilerdi qabyldaý Parlamenttiń kún tártibindegi basty taqyrypqa aınaldy. Elbasy usynǵan «100 naqty qadam» Ult Josparyn iske asyrýǵa qajetti zańdar qysqa merzim ishinde talqylanyp, der kezinde qabyldandy, deı kelip, Tóraǵa Májilis ýaqytsha bolmaǵan kezeńde Senat daǵdarysqa qarsy keshendi is-sharalardy júzege asyrýǵa qajetti 57 zań jobasy boıynsha tııanaqty jumys júrgizgenin jetkizdi.
Sonymen qatar, zań jobalarymen tııanaqty jumys istegen senatorlar men apparat qyzmetkerlerine alǵysyn aıtyp, Elbasy da Parlamenttiń qyzmetine joǵary baǵa bergenin eske salyp ótti. Sóziniń qorytyndysynda Qasym-Jomart Toqaev: «Biz memleket damýynyń mańyzdy kezeńine aıqyn maqsatty senimmen qadam bastyq. Elbasynyń elimizdi keshendi túrde jańǵyrtýǵa baǵyttalǵan reformalaryn odan ári tabysty iske asyrýǵa belsendi túrde qatysýymyz qajet», – dedi.
Osydan keıin Parlamenttiń besinshi shaqyrylymyndaǵy besinshi sessııasynyń sońǵy jalpy otyrysy óz jumysyn bastady.
Kún tártibine engizilgen máselelerdiń arasynda keıbir zańnamalyq aktilerge tutynýshylardyń quqyqtaryn qorǵaý boıynsha ózgerister men tolyqtyrýlar engizýdi qarastyrǵan zań jobasy birinshi oqylymda qarastyryldy. Zań jobasy boıynsha baıandama jasaǵan Ulttyq ekonomıka mınıstri Erbolat Dosaev tutynýshylardyń quqyqtaryn qorǵaýdyń pármendi tetikteriniń qatarynda taýarlardy qaıtarýǵa jáne aýystyrýǵa qoıylatyn talaptar jetildirilgenin aıtty. Atap aıtqanda, dedi ol, tutynýshynyń taýardyń kemshiligine qatysty talaptardy qoıý merzimderi belgilendi. Jumys atqarý men qyzmetter kórsetý jaǵdaılary naqtylandy. Sonymen qatar, oryndaýshynyń qasaqana jasyrǵan kemshilikteri anyqtalǵan jaǵdaıda talaptar qoıý merzimderi ulǵaıtyldy.
Zań jobasy boıynsha qosymsha baıandamany Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy T.Abaıdildın jasady. Zań jobasy shaǵyn talqylaýdan keıin birinshi oqylymda qabyldandy. Alaıda, T.Abaıdildın ony ekinshi oqylymǵa shyǵarý týraly usynys jasap, senatorlar ony qoldaǵan soń zań jobasy ekinshi oqylymda da qabyldandy. Sóıtip, tutynýshylar quqyn qorǵaýdy jetildirýge tıisti qujat Prezıdenttiń qol qoıýyna usynyldy.
Budan basqa, besinshi saılanymnyń sońǵy otyrysynda Ujymdyq qaýipsizdik týraly shart uıymyna (UQShU) múshe memleketterdiń temir joldaryn tehnıkalyq búrkemeleýdiń biryńǵaı júıesin qurý týraly kelisimniń qoldanys merzimin uzartý jáne oǵan ózgerister engizý týraly hattamany, áskerı jáne basqa da quralymdardy, olardyń jyljymaly múlkin, sondaı-aq, áskerı maqsattaǵy ónimdi tasymaldaý salasyndaǵy UQShU-ǵa múshe memleketterdiń yntymaqtastyǵy týraly kelisimdi, sondaı-aq, Qazaqstan men Avstrııa arasynda halyqaralyq júk tasymaldary týraly kelisimdi ratıfıkasııalaý týraly zań jobalary qaralyp, qabyldandy.
Al keıbir zańnamalyq aktilerge poshta, «jasyl ekonomıkaǵa» kóshý, astyq naryǵyn retteý, ekologııalyq máseleler boıynsha ózgerister men tolyqtyrýlar engizý jónindegi tórt zań jobasy ekinshi oqylymda qaralyp, qabyldandy. Sonymen qatar, Parlament Senatynyń Reglamentine palata qyzmetin uıymdastyrýǵa qatysty ózgerister men tolyqtyrýlar engizilip, besinshi sessııa óz jumysyn aıaqtady.
Jaqsybaı SAMRAT,
«Egemen Qazaqstan».