AQTО́BE. 21 naýryz. Aqtóbede Ulystyń Uly kúni qarsańynda qalaǵa qarasty «Zarechnyı» eldi mekeninde ornalasqan «Aınalaıyn» jeke balabaqshasy paıdalanýǵa berildi. Bul týraly egemen.kz tilshisi habarlady.
Bul balabaqshanyń qurylysyn kásipker Nurjan Qýatov salǵan. 50 oryndyq mektepke deıingi balalar mekemesiniń saltanatty ashylýyna oblys ákimi Berdibek Saparbaev qatysty. О́ńir basshysy ata-analardy qýanyshty sátterimen quttyqtap, ıgilikti sharanyń Qazaqstan Parlamenti Májilisi men máslıhat depýtattarynyń saılaýy, sondaı-aq, halqymyzdyń Naýryz merekesi qarsańynda ashylyp otyrǵanymen sabaqtastyrdy.
«Elbasy 2020 jylǵa deıin balalardy balabaqshamen tolyq qamtamasyz etýdi tapsyrdy. Qazir elimizde «Balapan» memlekettik baǵdarlamasy júzege asyrylýda. Prezıdenttiń memleket pen jekemenshiktiń áriptestigin damytý jónindegi tapsyrmasy boıynsha jergilikti bılik mektepke deıingi oryn tapshylyǵy máselesin kásipkerler men kompanııalar jetekshilerimen birlese otyryp sheshýde. Osy baǵyttaǵy jumystar barysynda jańa turǵyn úı keshenderindegi balalardy orynmen qamtýǵa basymdyq berilip otyr», – dedi aımaq basshysy.
Munda búldirshinderdi tárbıeleýge barlyq jaǵdaı jasalǵan. Ǵımarattyń aýmaǵy men top bólmelerinde onlaınǵa qosylǵan beıne baqylaý ornatylǵan. Baǵdarlamada memlekettik til men aǵylshyn tilin tereńdete oqytý, horeografııamen aınalysý qarastyrylǵan. Basty nazar «Deni saý urpaq – deni saý ult» baǵdarlamasyna aýdarylǵan jáne ata-analardyń qatysýymen sporttyq sharalar ótkiziletin bolady.
Balabaqshada 12 adam jumys isteıdi. Jalpy oblys ortalyǵynda halqymyzdyń ulyq merekesi Naýryzdyń qarsańynda 670 orynǵa arnalǵan 10 balabaqsha ashyldy. Osy atalǵan mektepke deıingi mekemelerde barlyǵy 150 adam eńbekke ornalasty.
Mereke kúnderi osynshama bala men olardyń ata-analary qýanyshqa bólendi. Buǵan deıin memleket pen jekemenshik áriptestigi aıasynda jumys isteıtin balaqshalar sany 33 bolsa, endi olardyń qatary 43-ke jetti.
Satybaldy Sáýirbaı.
Derek, sýret: egemen.kz.