Túrkistandyqtar tútinge tunshyǵa bere me?

Túrkistan qalasyn ıslam dinindegi 45 el ǵana emes, Q.A. Iаsa­­ýıdiń sharapatymen búkil álem halqy jaqsy biledi. Sondyqtan da bul qalaǵa musylmandar da, basqa dindegiler de qysy-jazy aǵylyp kelip jatady. Oǵan qo­sa Q.A.Iаsaýı atyndaǵy ha­lyq­aralyq qazaq-túrik ýnıversıtetinde 29 eldiń jastary kelip oqı­tynyn eskersek, osy stý­dentterdiń ata-analary da oqyp júrgen ul-qyzdarynyń hal-jaǵ­daılaryn bilý úshin Túr­kis­tanǵa jıi kelip turady. Tap qazir Túrkistan qala­syn­da bir ýnıversıtet, bir saz­dy drama teatr, 4 kolledj, 22 mektep, 4 aýrýhana, bir arnaýly mektep, bir múgedekter úıi, 5 balabaqsha, bir jasóspirimder or­talyǵy, bir qazaq-túrik lıseıi, bir mýzyka mektebi, bir da­ryn mektebi bar. Al, osylardyń bári birdeı ortalyq jylý júıe­sine qosylmaǵan, ózderinshe tirshilik jasap, kúnderin kórýde. Son­daı-aq, qalada 19 toıhana, 21 kafe, 7 saýna, 5 dárihana, 31 saýda oryndary men 17 meshit taǵy bar. Endi buǵan 21992 jeke turǵyn úılerdi qosyńyz. Mine, osylar­dyń bári tańerteńgi saǵat 7-den bastap keshki 10-ǵa deıin ot ja­ǵady. Osynsha peshterden shyqqan kómirdiń qoıý qara tútininen kó­shede júrip-turý múmkin emes, tunshyǵa jótelip, keıde qusyp ta jiberesiz. Al, osyndaı kezde sheteldik qonaqtar (týrıster) Túr­kistanǵa kelip, qala halqynyń mynadaı halin kórse, bizdiń otyn tasyp, kúl shyǵaryp júrgen HHI ǵasyrdaǵy tirligimizdi kúlki etip júrmeı me? «Qyrsyqqanda qymyran irıdi» degendeı, bıyl kún sý­yt­qaly beri Túrkistanda tútindi aıdap áketetin jel de, olardy soryp alatyn qar da joq. Son­dyqtan bolar, qalany qoıý qara tútin jan-jaqtan tumshalap, tu­mandatyp, kúndiz-túni basyp turady. Anyǵyn aıtsaq, 50-60 metr jerdegi adamnyń nobaıyn kórý qıyn. Mine, osynyń sal­darynan júregi men ókpesiniń aqaýy bar kisilerdiń arasynda oqys ólim-jitim de óte kóp. Búginde kim bolsa sol paı­dalanyp jatqan tabıǵı gazdyń qasıetti Túrkistan qalasyna osy ýaqytqa deıin kelmeýi, ha­lyqqa buıyrmaýy ókinishti jaǵ­daı. Túrkistan qalasynda tu­ratyn 150 myń halyqty qa­zir­gi kúni qashanǵa deıin ot ja­ǵyp, kúl shyǵara beremiz degen saýal alańdatady. Eltaı BIMAHANBETULY, Túrkistan qalasynyń qurmetti azamaty, zeınetker. Ońtústik Qazaqstan oblysy.