Qar sýynyń qarǵyny

Qostanaı óńirine qaýip tóndirip tur Bıylǵy meshinniń minezi Qostanaıǵa jeńil tıip turǵan joq. Osy óńirdegi aqsaqaldar ótken qystaǵydaı kóp qardy eske túsire almady. Ádette, Tobyl óńi­rinde jaýǵan qar jylda tobyqtan tómen bolmaıtyn. Degenmen, osy qysta jaýǵan ulpanyń surqy bólek. Maman­dardyń aıtýynsha, ótken jyldarǵa qaraǵanda, eki-úsh esege deıin kóp túsken. «Naýryzdyń aqsha qary» da, «qusqanaty» bir emes, bir­neshe ret jaýyp ketti. En­di aýa raıyn boljaýshylar naýryz aıynyń sońynda jaýǵan qardyń aıaǵy jańbyrǵa ulasady dep otyr. Tobyl-Torǵaı óńirinde bıyl sý tas­qyny qaýpi kúshti. Oblystyń ońtús­tigindegi Torǵaı óńirinde qar erip, sý tasyp jatyr. Mamandar sý­dyń jaıylǵany bolmasa, asa qaýpi joq ekenin aıtty. Al oblystyń soltústik aýdandary – Tobyl óńirinde qardyń murty buzylǵanymen kóbesi sógilgen joq, qarǵyn sýdyń qoz­ǵalysy baıaý. – Qazir Qaratomar sý qoı­­masyna sekýndyna 50 tekshe metr sý jiberip jatyrmyz. Bul sý qoımasynda 470 mıllıon tekshe metr sý sııatyn oryn bar. Gıdro­logtar da bıylǵy qar sýy­nyń kólemi osy shama­las ekenin aıtýda. Qar kó­besi sógilip, qar­ǵynnyń qozǵa­lysy kúsheıgen kezde sý qoımasyna sekýn­dyna 100 tekshe metrge deıin sý kete­tin bolady. Sý tasqyny qaý­­pi de sol kezde kúsheıe tú­sedi, – deıdi Aýyl sha­rýa­­shylyǵy mınıstrligi sý resýrs­tary komıtetiniń «Qaz­sýshar» sharýa­shylyq júr­gizý quqyǵyndaǵy res­pýb­lıkalyq memlekettik ká­siporny Qostanaı fılıaly dırektorynyń orynbasary Jambylbek Raıymqulov. Al Qostanaı qalasyna kóktem erterek kelgen sekildi. Qalanyń ishi del-sal erip jatyr. Qostanaıdyń keıbir kóshelerinde, shaǵyn turǵyn aýdandarda erigen qar sýynan adamdardyń júris-turysy qıyndaǵan. Tehnıkalar barynsha bólinip, áli de qar shyǵarý jumystarymen aınalysýda. Naýryz aıynyń ortasynan bastap qaladan 40 myń tekshe metr qar syrtqa tasyldy. Aýa raıyn boljaýshylar Tobyl óńirinde «sáýir bolmaı táýir bolmaıtynyn» aıtty. Názıra JÁRIMBETOVA, «Egemen Qazaqstan». QOSTANAI.