TARAZ. 30 naýryz. Bıyl Jambyl oblysynda qant qyzylshasynyń kólemin 6 myń gektarǵa jetkizý josparlanýda. Bul týraly egemen.kz tilshisi habarlady.
Osyǵan baılanysty oblys kóleminde ornalasqan aýyl sharýashylyǵy qurylymdarynyń aınalymdyq qarajatynyń joǵyn eskere otyryp, qant qyzylshasy daqylyna qajetti tuqymdy satyp alý maqsatynda oblystyq bıýdjetten 220 mln. teńge bólindi. «OrtaAzııalyq» qant korporasııasymen kelissózder júrgizilip, ótinish berildi. Qant zaýyttarynan alynǵan tuqymnyń qunyn aýylsharýashylyq taýar óndirishýlerine bolashaqtaǵy óniminiń esebinen tóleıdi. Budan basqa Merki aýdanynda 157,5 jáne Shý aýdanynda 316,5 sebý birligi quraıtyn qant qyzylshasynyń tuqymy qolda bar.
Jambyl oblysy ákimdiginiń aýyl sharýashylyǵy basqarmasynyń basshysy Nurjan Nurjigitovtiń aıtýynsha, oblys boıynsha qant qyzylshasy daqylynyń agrotehnıkalyq is-sharalaryn atqaratyn 244 birlik aýyl sharýashylyǵy tehnıkalar bar. Osy atalǵan tehnıkalar búgingi kúnde qant qyzylshasyn ońtaıly merzimde atalǵan is-sharalardy atqarýǵa jetispeıdi. Sondyqtan oblystyq bıýdjetten tehnıkalardy satyp alýǵa 200 000 myń teńge qarjy bólindi.
«Budan bólek, Shý jáne Qordaı aýdandary «Merki qant zaýyty» JShS-nen shalǵaı ornalasýyna baılanysty, «OrtaAzııalyq qant korporasııasy» JShS-men tasymaldaýǵa ketetin shyǵyndarynyń bir bóligin qant zaýyttary satyp alý qunyna qosyp tóleý úshin kelisim sózder júrgizildi. Sonymen qatar, búgingi kúnge qant zaýyttary jáne Aýyl sharýashylyǵy mınıstrligimen qant qyzylshasynyń satyp alý baǵasyna beriletin sýbsıdııalaý kólemin arttyrý týraly da kelisim jumystary júrip jatyr», deıdi NurjanNurjigitov.
Oralhan Dáýit.
Derek, sýret: egemen.kz