ASTANA. 30 naýryz. Búgin Mádenıet jáne sport mınıstrliginde XV jazǵy Paralımpııa oıyndaryna qatysatyn Qazaqstan sportshylarynyń daıyndyǵyna arnalǵan jedel shtabtyń otyrysy ótti. Osy jıynda mınıstrliktiń Sport jáne dene shynyqtyrý isteri komıtetiniń tóraǵasy Elsııar Qanaǵatov Paralımpııa oıyndarynyń chempıondary men júldegerlerine páter beriletinin aıtty. Bul týraly egemen.kz tilshisi habarlady.
«Zańnamaǵa sáıkes, Paralımpıadada chempıon nemese júldeger atanǵan sportshylarǵa baspana berý men aı saıynǵy materıaldyq qoldaý normalary qarastyrylǵan. Osy kezge deıin baspana men aqshalaı syıaqyny tek Olımpıada chempıondary men júldegerleri ǵana alǵan edi. Endi jańa zań boıynsha paralımpıadashylar da tıisti páter men syıaqylaryn alatyn bolady. Bul óte durys sheshim.», dedi Elsııar Qanaǵatov.
Onyń aıtýynsha, Paralımpıada chempıony 50 000 AQSh dollaryn, kúmis júldeger 35 000 dollar, qola júldeger 25 000 dollar alsa, tórtinshi orynǵa 14 000, besinshi orynǵa 6 000, altynshy oryn alǵan sportshyǵa 4 000 AQSh dollary beriledi.
Dastan Kenjalın.
Derek, sýret: egemen.kz