ASTANA. 30 naýryz. Qazaqstan Prezıdenti Nursultan Nazarbaev Eýropalyq komıssııa tóraǵasy Jan-Klod Iýnkermen kezdesti. Bul týraly akorda.kz-ke silteme jasaǵan egemen.kz tilshisi habarlady.
Kezdesýde Qazaqstan men Eýropalyq odaq arasyndaǵy saıası, saýda-ekonomıkalyq baılanystardy nyǵaıtý joldary qarastyryldy. Taraptar sondaı-aq, halyqaralyq kún tártibin, sonyń ishinde Ortalyq Azııa óńirindegi óńirlik yntymaqtastyqtyń negizgi máselelerin talqylady.
Sonymen qatar, Nursultan Nazarbaev pen Jan-Klod Iýnker buqaralyq aqparat quraldary úshin birlesken brıfıng ótkizdi.
Qazaqstan Prezıdenti elimizdiń Eýropalyq odaqpen 23 jyl boıy yntymaqtasyp kele jatqanyna nazar aýdardy.
«Búginde Qazaqstan – Eýroodaqpen keńeıtilgen seriktestik jáne yntymaqtastyq týraly kelisimge qol qoıǵan burynǵy keńestik keńistiktegi birden-bir el. Bul qujatqa byltyr qol qoıyldy, respýblıkamyz ony ratıfıkasııalady, sondyqtan osy kelisimniń ekonomıkalyq bóligin 1 mamyrdan bastap ýaqytsha paıdalana alamyz», – dedi Nursultan Nazarbaev.
Memleket basshysy elimizde ótken prezıdenttik jáne parlamentik saılaýlarǵa baılanysty quttyqtaý joldaǵany úshin de alǵys aıtty.
«Taıaýdaǵy parlamenttik saılaýdy 1000-ǵa jýyq sheteldik baıqaýshy baqylady, olar saılaý úderisi demokratııa, bostandyq jáne básekege qabilettilik qaǵıdattary negizinde barlyq tıisti zańnamany saqtaı otyryp júzege asyrylǵanyn rastady», – dedi Qazaqstan Prezıdenti.
Nursultan Nazarbaev Eýropalyq odaq elderin aldaǵy «EKSPO-2017» kórmesine jáne «Astana» halyqaralyq qarjy ortalyǵyn qurý isine qatysýǵa shaqyrdy.
Memleket basshysy Qazaqstan men Eýroodaq sanksııalyq teketiresti ásirese onyń bizdiń elge yqpalyn eskere otyryp, barlyq múddeli taraptarǵa tıimdi túrde sheshý jónindegi is-qımyl aıasyndaǵy birlesken jumysty jalǵastyrýǵa ýaǵdalasqanyn aıtty. Nursultan Nazarbaev Qazaqstannyń taıaý kórshilerimen – Qytaı Halyq Respýblıkasymen jáne Reseı Federasııasymen jaqyn dostyq qarym-qatynas ornatyp otyrǵanyna, olar ekonomıkalyq yntymaqtastyq boıynsha negizgi seriktes bolyp sanalatynyna nazar aýdardy.
Memleket basshysy kelissózder barysynda Qazaqstan men Eýropalyq odaq azamattarynyń ózara barys-kelisi, sonyń ishinde Eýroodaq tarapynyń da vıza rejimine qatysty jeńildik jasaý múmkindigi týraly máseleler qozǵalǵanyn atap ótti. Taraptar Qazaqstan áýe kompanııalarynyń Eýropalyq odaq elderine ushýyn shekteýge baılanysty ahýaldy sheshý jaıyn da talqylady.
Sońynda Nursultan Nazarbaev qarastyrylǵan barlyq másele boıynsha ózara túsinistikke qol jetkizilgenine nazar aýdardy.
Jan-Klod Iýnker saýda-ekonomıkalyq yntymaqtastyqtyń odan ári damı beretinine senim bildirdi.
«Bul tyǵyz qarym-qatynastar san túrli formaǵa ıe bolýda. Eýropalyq odaq – Qazaqstannyń mańyzdy ekonomıkalyq seriktesi», – dedi Eýropalyq komıssııa tóraǵasy.
Sondaı-aq, ol mańyzdy óńirlik úderisterge qatysyp otyrǵan Qazaqstannyń bitimgerlik yqpalyna Eýropalyq odaqtyń senim artatynyn atap ótti.
Jan-Klod Iýnker kelissóz barysynda Qazaqstanda júzege asyrylyp jatqan reformalar men adam quqyǵyn odan ári qamtamasyz etý máseleleri qozǵalǵanyn aıtty.
Talǵat Raıymbek.
Derek, foto: akorda.kz.